Tuwma júrek nuqsanı menen tuwılǵan balalar ushın biypul imkaniyat jaratıldı,-dep xabar bermekte Qaraqalpaqstan medicina institutı baspasóz xızmeti.

Xabarıńız bar, 18-23-avgust kúnleri Tashkent qalasınan kelgen Akademik V.Vohidov atındaǵı Respublikalıq qánigelestirilgen xirurgiyalıq orayı kardioxirurgları Qaraqalpaqstan medicina institutı klinikasında jumıs alıp barmaqta.
Usı hápte dawamında tuwma júrek nuqsanı menen tuwılǵan balalar biypul medicinalıq tekseriwden ótkerilmekte. Eger xirurgiyalıq operaciya zárúr dep tabılsa, operaciya da biypul ámelge asırılmaqta.
Usı kúni nókisli ana – Ótemuratova Áliyma óz perzentiniń operaciyası tabıslı ótkeninen qattı quwanıshlı. Ol Húrmetli Prezidentimizge, kardioxirurglar brigadasına hám Qaraqalpaqstan medicina institutı klinikasınıń shıpakerlerine tereń minnetdarshılıq bildirdi.
Ananıń sózlerine bola, uzaq jıllar dawamında perzentiniń keselligi sebepli qıynalǵan shańaraq búgin jańa ómir hám úmitke iye boldı.
Bul iygilikli baslama tek ǵana balalardıń ómirin saqlap qoymastan, al mıńlaǵan ata-analarǵa da kúsh hám isenim baǵıshlamaqta.

Qaraqalpaqstan xabar agentligi