Múnásibet

20-avgust – Isbilermenler kúni múnásibeti menen Prezidentimiz Shavkat Mirziyoevtiń isbilermenler menen ashıqtan-ashıq sóylesiwi mámleketimizde isbilermenlikti rawajlandırıw jolındaǵı áhmiyetli tariyxıy waqıya boldı. Bul ushırasıwda sóz etilgen máseleler hám qabıl etilgen qararlar elimizde isbilermenlerdiń jumısına jáne de keńnen jol ashıp bermekte.
Keyingi segiz jıl ishinde elimizge 230 milliard dollarlıq investiciya kirip kelip, sonnan 120 milliard dollardan aslamı sırt el investiciyaları ekeni – Ózbekstan ekonomikasınıń ashıqlıǵı hám tartımlılıǵınan derek beredi. Sonıń menen birge, isbilermenlerdiń mıńǵa shamalas baslaması nızamshılıqta óz kórinisin tapqanı olardıń mámleketlik siyasattaǵı ornı hám áhmiyeti barǵan sayın artıp atırǵanın kórsetedi.
Bıyıl aymaqlarda sanaat infrastrukturasın jaqsılaw ushın 1,7 trillion sum ajıratılǵanı, kelesi jılı bolsa bul qarjınıń 25 procentke arttırılatuǵını da isbilermenler ushın úlken qollap-quwatlaw bolıp esaplanadı. Sonday-aq, turizm tarawın rawajlandırıw maqsetinde miymanxana hám oraylar shólkemlestiriw ushın kelesi úsh jılda 5 mıń gektar jerdiń aukcionǵa shıǵarılıwı hám isbilermenlerdiń jer ushın tólemnen azat etiliwi – elimizde turizm tarawın pútkilley jańa basqıshqa kóteriwge xızmet etedi.
Prezidentimiz shıǵıp sóylegen sózinde ayrıqsha atap ótilgen baǵdarlardan biri – jeke menshik medicina tarawı boldı. Sońǵı jeti jılda jeke menshik klinikalardıń sanı 3,5 mıńnan 8,5 mıńǵa jetkeni bul tarawdıń izbe-iz rawajlanıp atırǵanın kórsetedi. Bul arqalı tarawǵa toplanǵan tájiriybe, zamanagóy texnologiyalar hám maman kadrlardıń sapa kórsetkishlerin de keskin jaqsıladı.
Eń áhmiyetlisi, shegara aymaqlarında zamanagóy medicina klasterlerin shólkemlestiriw rejelestirilmekte. Olarda klinika, reabilitaciya orayı, miymanxana hám laboratoriyalar jumıs alıp baradı. Bunday joybarlardı ámelge asırıw ushın mámleket tárepinen 200 million dollarlıq jeńilletilgen kredit liniyasınıń ashılıwı, isbilermenlerge 7 jıl múddetke, 3 jıllıq jeńilletilgen dáwir menen 17 procentlik kreditler ajıratılıwı – taraw wákilleri ushın úlken imkaniyat bolıp esaplanadı.
Biz, jeke menshik medicina tarawında jumıs alıp barıp atırǵan isbilermenler, bunday qollap-quwatlaw siyasatınan tereń minnetdarmız. Prezidentimiz tárepinen bildirilgen hár bir baslama tek ǵana tarawdıń rawajlanıwına emes, al xalıqtıń salamat turmıs keshiriwine xızmet etedi.
Jeke menshik klinikanıń basshısı hám deputat sıpatında bizge jaratılǵan bul imkaniyatlardı múnásip qollap-quwatlap, mámleketimizdiń rawajlanıwı, xalqımızdıń densawlıǵı hám abadanlıǵı ushın shın kewilden xızmet etetuǵınımızdı atap ótpekshimen.
Ashık sáwbetlesiw isbilermenlik hám tarawdıń rawajlanıwında jańa basqıshtıń tiykarı bolıp, isbilermenler ushın jańa imkaniyatlar esigin ashtı. Onda bildirilgen pikir-usınıslar ámeliy sheshimler islep shıǵıwǵa, taraw jumısın nátiyjeli baǵdarlawǵa xızmet etedi. Sonday-aq, isbilermenler arasındaǵı birge islesiwdi kúsheytip, innovaciyalıq ideyalar hám jańa baslamalardı turmısqa engiziwge iytermelemekte.
Bul bolsa tek ǵana jumısımızdı jáne de janlandırıw emes, al ekonomikalıq rawajlanıwdı támiyinlew jolında ayrıqsha qádem sıpatında áhmiyetke iye.

Baxtiyar Otelbaev,
Xalıq deputatları Qońırat rayonlıq Keńesiniń deputatı,
rayondaǵı “Soǵlom yurak klinikası” jeke menshik kárxanasınıń baslıǵı.

Qaraqalpaqstan xabar agentligi