Shınında da, ǵárezsizlik sebepli elimiz suveren, demokratiyalıq, huqıqıy, sociallıq hám dúnyalıq mámleketke, xalıqaralıq huqıqtıń tolıq subektine aylandı. Jer júzindegi túrli mámleketler hám xalıqlar menen doslıq hám birge islesiw baylanıslarımız barǵan sayın keńeyip, elimizdiń xalıqaralıq maydandaǵı abırayı artıp barmaqta.

Aymaqlarda xalıqtıń keń qatlamları arasında Ǵárezsizlik bayramına baǵıshlanǵan ruwxıy-aǵartıwshılıq ánjumanlar, ushırasıwlar, ashıq pikirlesiw hám sáwbetlesiwler, ádebiy-kórkem kesheler, seyiller, mádeniyat hám sport ilajları ótkeriledi.
Eki kún dawamında elimiz boylap “Abat hám payızlı máhálle – elimiz kórki!” súreni astında ótkerilip atırǵan ulıwmaxalıqlıq qayırqomlıq shembiligi de usınday iygilikli maqsetlerdi ózinde jámlegen.
Qaraqalpaqstan Respublikası boyınsha usı shembilikke eki kún dawamında 500 mıńǵı shamalas puqaranıń qatnasıwı kútilmekte. Sonnan 172 mıńǵa shamalasın jaslar quraydı. 2418 gektar maydan abadanlastırıladı, 1900 tonna turmıslıq hám qurılıs shıǵındıları shıǵarıp taslanadı, 981 kilometrlik jap-salma hám lotoklar tazalanadı. Bul jumıslarǵa 377 texnika quralları tartıladı. 461 qoyımshılıq, 8 zıyarat etiw orınları, 13288 kóshe tazalanıp abadanlastırılıp, 235388 terekke sulıw kórinis berilip, háklenedi. 428 balalardıń oynaw maydanshaları ońlanıp, tártipke keltiriledi. 23 mıńnan aslam xojalıqtıń qıytaq jerleri awdarılıp, abadanlastırıladı. 943 shańaraqqa tiyisli turaq jaylar ońlawdan ótkeriledi. 1851 járdemge mútáj shańaraqqa materiallıq járdem kórsetiledi.
Álbette, bulardıń barlıǵı bunnan otız tórt jıl aldın qolǵa kirgizilgen milliy ǵárezsizligimiz, búgingi kúnde kóp milletli pútkil xalqımızdı Jańa Ózbekstandı qurıwday ullı maqset jolında birlestirip, jańa jetiskenlikler hám sheklerge qaray ruwxlandıradı.
Respublikamız boylap qayırqomlıq shembiligi baslanıp, qızǵın dawam etpekte.

Á.Jiyemuratov,
Qaraqalpaqstan xabar agentligi