Prezident Shavkat Mirziyoevtiń basshılıǵında joqarı bilimlendiriw mákemeleri pitkeriwshileriniń bántligin támiyinlew máselelerine baǵıshlanǵan májiliste jas qánigeler ushın zamanagóy talaplar tiykarında jańa jumıs orınların jaratıw máselelerine itibar qaratıldı.

Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komiteti baslıǵınıń orınbasarı Odiljon Mamatkarimov bul boyınsha múnásibet bildirdi:
– Mámleketimiz basshısı globallasıw dáwirinde miynet bazarı tek ǵana san menen emes, al sapa menen de bahalanatuǵınına toqtap ótti. Jaqın jıllarda elimizde iske qosılıwı rejelestirilgen 83 milliard dollarlıq iri joybarlar nátiyjesinde sanaattıń ózinde 500 mıńǵa shamalas maman qánigelerge talap payda bolatuǵını atap ótildi.
Bul bolsa, básekige shıdamlı, zamanagóy texnologiyalardı puqta iyelegen, jańalıqqa tez beyimlese alatuǵın, xalıqaralıq standartlarǵa juwap beretuǵın qánigeler kerek ekenligin ańlatadı.
Sonlıqtan, joqarı bilimlendiriw sistemasın jumıs beriwshilerdiń talaplarına beyimlestiriw, oqıw baǵdarlamaların tarawdıń rawajlanıwı hám texnologiyalıq jańalıqlarǵa beyimlestiriw áhmiyetli hám tiykarǵı wazıypaǵa aylanıwı kerek.
Básekige shıdamlı kadrlar tayarlaw ushın, álbette, oqıw procesin óndiris penen integraciyalaw, ámeliyat kólemin kóbeytiw, taraw qánigeleri menen tikkeley islesiw hám bilimlendiriwdi innovaciyalıq texnologiyalar menen bayıtıw zárúr.
Májiliste atap ótilgen áhmiyetli máselelerden biri – bahası 1 million dollardan, jumısshılardıń sanı 50 den aslam bolǵan joybarlar boyınsha qánigelerge zárúrlikti anıqlaw bolıp esaplanadı. Bul arqalı juwapker ministr hám tarmaq basshısı joqarı oqıw ornına buyırtpa jaylastırıp, kadrlardı maqsetli tayarlawdı jolǵa qoyadı.
Bunday qatnas nátiyjesinde studentler keleshekte qanday jumıs ornına iye bolatuǵının jaqsı biledi. Jumıs beriwshiler bolsa mútájligine qarap puqta tayarlanǵan qánigelerdi qabıl etedi.
Bul sistema “diplom bar, jumıs joq” mashqalasın azaytadı, joqarı bilimlendiriw hám óndiris arasındaǵı úzilisti saplastıradı hám pitkeriwshilerdiń miynet bazarında básekige shıdamlı bolıwın támiyinleydi.
Sonıń menen birge, joqarı oqıw orınları oqıw baǵdarlamaların bazar talaplarına jedel beyimlestiriw, ámeliyat bazasın keńeytiw hám kadrlar tayarlawdıń sapasın arttırıw kerek boladı.
Endigiden bılay pitkeriwshini jumısqa alǵan kárxana isbilermenlik reytinginde qosımsha ballǵa iye boladı. Bul mexanizm kárxanalardı tek ǵana payda alıw emes, al óz reytingin hám bazardaǵı abırayın arttırıw ushın da jas qánigelerdi jumısqa alıwǵa iytermeleydi.
Bunnan tısqarı, hár bir wálayatta “biznes inkubator”lar shólkemlestiriliwi hám bul arqalı pitkeriwshilerdi bánt etiw baslaması alǵa qoyıldı. Bul bolsa jergilikli ekonomikanı rawajlandırıw, jaslardıń bántligin támiyinlew hám innovaciyalıq ideyalardı ámeliyatqa engiziwde úlken áhmiyetke iye.
Bunday inkubatorlar isbilermenlik, marketing, dizayn hám málimleme texnologiyaları sıyaqlı zamanagóy hám joqarı talapqa iye baǵdarlardaǵı qánigelerge qábiletin kórsetiwge imkaniyat beredi.
Sonıń menen birge, hár bir aymaqta 10 mıńǵa shamalas pitkeriwshiniń jumıs penen támiyinleniwi, olardıń mamanlıǵı bazar talaplarına sáykes túrde qáliplesiwi arqalı jergilikli biznestiń básekige shıdamlılıǵı artıwı kútilmekte.
Demek, endi jaslar tek ǵana jumıs ornı emes, al óz startap hám joybarların ámelge asırıw ushın zárúr sharayatlarǵa iye boladı.
Bul baslama aymaqlarda jańa jumıs orınlarınıń teń bólistiriliwi hám jaslardıń májbúriy migraciyası azayıwına járdem beretuǵını sózsiz.
Búgingi kúnde isbilermenlik, marketing, dizayn hám málimleme texnologiyaları sıyaqlı baǵdarlar zamanagóy ekonomikanıń eń tez rawajlanıp atırǵan segmentleri bolıp, olarda jumıs orınların jaratıw salıstırmalı tez hám az qárejet penen ámelge asadı. Ásirese, IT hám dizayn global bazarǵa shıǵıw imkaniyatın beredi. Bul bolsa, eksport dáramatların arttırıwǵa da xızmet etedi.
Mámleket ekonomikasınıń strategiyalıq tarmaqları ximiya, energetika, geologiya, avtosanaat, metallurgiya, toqımashılıq, elektrotexnika, qurılıs, transport hám logistika tarawlarında jaslardı jumıs penen támiyinlew imkaniyatları da bar.
Bul tarawlar tek ǵana iri óndiris quwatlılıqlarına iye emes, al zamanagóy texnologiyalardı engiziw, innovaciyalar jaratıw hám xızmet kórsetiw baǵdarlarında da úlken potencialǵa iye.
Jaslardıń bul tarmaqlarǵa tartılıwı olardıń professional rawajlanıwın jedellestiredi, jańa qánigelik hám kónlikpelerdi qáliplestiredi, kadrlar bazarında básekige shıdamlılıǵın arttıradı.
Juwmaq ornında aytıw múmkin, bul baǵdarda mámleketimiz basshısı sistemalı qatnastı belgilep berdi. Alǵa qoyılǵan baslamalardıń ámeliyatqa engiziliwi bilimlendiriw hám óndiris arasındaǵı úzilisti saplastırıp, jaslardıń tez hám sapalı jumısqa jaylasıwına tiykar jaratadı.

ÓzA