Elimizdiń tariyxı, ózine tán mádeniy hám materiallıq miyrası dúnya xalqın hámiyshe tań qaldırıp kelgen. Tariyxıy miyrastı zamanagóy hám ózine tán kórkem kózqaraslar menen jámlestirgen, saqlaǵan hám úylestirgen halda búgingi hám keleshek áwladlarǵa jetkeriw bárqulla áhmiyetli bolıp esaplanǵan.

Pekin qalasında Ózbekstan Mádeniyat hám kórkem ónerdi rawajlandırıw qorınıń baslıǵı Gayane Umerova Qıtay mámleketlik qurılıs injenerlik korporaciyası xalıqaralıq bóliminiń baslıǵı mırza Gao Bo menen ushırasıw ótkerdi.
Ushırasıw orayında belgili yapon arxitektorı Tadao Ando tárepinen islep shıǵılıp atırǵan jańa Ózbekstan Milliy muzeyiniń qurılısı boyınsha birge islesiw máseleleri dodalandı, delinedi Ózbekstan Respublikası Mádeniy miyras agentligi maǵlıwmatında. Joybar ámelge asırılǵannan soń, mámleketimizdiń tariyxıy miyrası hám zamanagóy kórkem kózqarasların úylestirgen jańa mádeniy simvolǵa aylanadı.
Tárepler qurılatuǵın komplekstiń arxitekturalıq sheshimleri, sapası, bul baǵdarda bekkem hám shıdamlı materiallardan paydalanıw hám aldınǵı xalıqaralıq tájiriybelerdi engiziwge ayrıqsha itibar qarattı. Birgeliktegi háreketler nátiyjesinde joybar eń joqarı dárejede ámelge asırılıp, Ózbekstan hám pútkil Oraylıq Aziyanıń jetekshi mádeniy orayına aylanıwı kútilmekte.

ÓzA