Mámleketimiz basshısı tárepinen jaslardıń intellektuallıq potencialın rawajlandırıwǵa qaratılǵan reformalar hám baslamalar búgin óz nátiyjesin bermekte.

Prezidentimizdiń “Zakovat” intellektuallıq oyının xalıq arasında ǵalabalıq-aǵartıwshılıq háreketke aylandırıw hám basqa da intellektuallıq oyınlardı rawajlandırıwǵa baylanıslı ilajlar haqqında”ǵı qararı bul baǵdarda áhmiyetli baǵdarlama bolmaqta. Atap ótilgenindey, jaslardıń logikalıq bilimlerin arttırıw, olardı saylap alıw hám intellektuallıq oyınlarǵa tartıw, xalıq arasında aǵartıwshılıq ortalıǵın kúsheytiw mámleketlik siyasattıń tiykarǵı baǵdarlarınan birine aylandı.
Ámelge asırılıp atırǵan ilajlar nátiyjesinde jaslarımız tek ǵana respublikalıq emes, al xalıqaralıq maydanda da abıraylı jarıslarda múnásip qatnasıp, elimizdiń abırayın múnásip qorǵamaqta.
Qırǵız Respublikasınıń Bishkek qalasında “Zakovat Asian Cup II” jarısı bolıp ótti. Bellesiwlerde Ózbekstan hám Qırǵızstan jaslarınan dúzilgen saylandı komandalar kubok ushın gúres alıp bardı.
Birinshi oyın 6:2 esabı menen elimiz komandasınıń paydasına juwmaqlandı. Ekinshi bellesiwde de jaslarımız jeńiske erisip, nátiyjede Ózbekstan saylandı komandası “Zakovat Asian Cup II” jarısınıń jeńimpazı dep tabıldı. Sonday-aq, ilaj sheńberinde túrli mádeniy-aǵartıwshılıq baǵdarlamalar da shólkemlestirildi.
“Zakovat Asian Cup II”te qolǵa kirgizilgen jeńis jaslarımızdıń intellektuallıq kúsh-qúdireti, logikalıq pikirlew sheberligi hám dúnya maydanında múnásip básekilese alıwın ayqın kórsetti.

ÓzA