Múnásibet

Mámleketimizde 20-avgust – Isbilermenler kúni sıpatında keńnen belgilenedi. Mámleketimiz basshısı Shavkat Mirziyoev usı kásiplik bayramdı shólkemlestiriw baslamasın 2021-jıl 20-avgustta isbilermenler menen ashıqtan-ashıq sóylesiw túrinde bolıp ótken ushırasıwda alǵa qoyǵan edi. Hár jılı áyne usı kúni Prezidenttiń biznes hám isbilermen toparlardıń wákilleri menen ashıqtan-ashıq sóylesiwi ótkeriliwi dástúrge aylanǵan. Ózbekstan Respublikasınıń “Isbilermenler kúnin belgilew haqqında”ǵı nızamı 2021-jıl 23-dekabrde qabıl etilgen. Sońǵı jıllarda dástúrge aylanǵan bul sóylesiw tarawdaǵı sistemalı mashqalalardı sheshiwi, usınıslardıń dodalanıwı hám jańa qolaylıqlar jaratılıwı menen isbilermenler kútetuǵın ilajǵa aylandı.
Dástúriy usınday ushırasıwlarda isbilermenlerdi qızıqtırıp atırǵan máseleler dodalanıp, olar menen másláhátlesip qararlar qabıl etilip atırǵanı Prezidentimizdiń isbilermenlik tarawına qaratıp atırǵan ayrıqsha itibarınıń ayqın kórinisi bolıp esaplanadı. Ashıqtan-ashıq sóylesiw aldında mámleketimiz basshısı elimiz isbilermenlerin usı qutlı sáne menen qutlıqlap, olardıń jumısına tabıslar tiledi. Mámleketimiz jetekshisi óziniń shıǵıp sóylegen sózinde elimiz ekonomikasında búgingi kúnde isbilermenlerdiń ornı joqarı ekenin atap ótti. Elimizde ekonomikamızdıń shın mánisinde drayverine aylanǵan isbilermenlerdiń jańa áwladı qáliplesti. Hár bir isbilermen óziniń izinen onlaǵan adamlardı ertip, jumıslı, dáramatlı etedi, jámiyetlik turmısqa jańalıq alıp keledi. Sizler búgin Jańa Ózbekstannıń isbilermenlik biznes mektebin jaratıp atırsız,-dedi Prezidentimiz.
Hámmemizge belgili, mámleketimiz basshısınıń usı jıl 18-avgusttaǵı pármanına muwapıq, isbilermenlik ortalıǵın jaqsılaw baǵdarında jaratılǵan imkaniyatlardan únemli paydalanıp, elimizdiń ekonomikalıq qúdireti hám eksport potencialın arttırıwda salmaqlı nátiyjelerge erisip, zamanagóy bilim hám tájiriybesin kórsetip, investiciyalardı tartıw, importtıń ornın basatuǵın ónimler islep shıǵarıw, xızmetler kórsetiwdi bunnan bılay da keńeytiw, xalıqtıń bántligi hám abadanlıǵın támiyinlew jolında ayrıqsha jankúyerlik kórsetip atırǵan, elimizdiń rawajlanıwına múnásip úles qosıp kiyatırǵan isbilermenlerdiń bir toparı Watanımızdıń joqarı sıylıqları, húrmetli ataq, orden hám medalları menen sıylıqlanǵan edi.
Búgin maqtanısh penen ayta alamız, bul ilaj tek ǵana ilaj emes, mámleket hám biznes arasındaǵı óz-ara isenimdi bekkemlewge xızmet etetuǵın janlı hám shın kewilden pikirlesiw maydanı ekeni atap ótildi.
Ashıqtan-ashıq sóylesiwde Prezidentimiz reformalardıń dáslepki kúnlerinen-aq isbilermenler menen pikirles bolıp, ekonomikası qúdiretli, sanaatı básekige shıdamlı, finanslıq sisteması turaqlı, barlıq tarawları investorlar ushın tartımlı bolǵan Jańa Ózbekstandı qurıwǵa kirisilgenin atap ótti. Haqıyqatında da, keyingi jılları elimizde ámelge asırılıp atırǵan keń kólemli reformalar, ásirese, barlıq tarawlar sıyaqlı jeke menshik sektordı qollap-quwatlawǵa qaratılǵan ilajlar óziniń nátiyjesin kórsetpekte. Ótken segiz jılda ekonomikamızdıń kóplegen tarmaqları jańadan shólkemlestirildi. Oǵan tek ǵana ótken dáwirde ekonomikaǵa tartılǵan 230 milliard dollarlıq investiciya ayqın mısal bolıp esaplanadı. 120 milliardtan aslam sırt el investiciyalarınıń tartılǵanı xalıqaralıq isenimniń artqanın kórsetedi.
Búgingi kúnde Ózbekstanda 600 den aslam startaplar jumıs alıp barmaqta. Segiz jıl burın olardıń sanı barmaq penen sanalatuǵın edi. Sóylesiwde keleshegimiz bolǵan jaslardıń mıń startap ideyası kommerciyalastırılıp, sonnan 200 i xalıqaralıq bazarǵa alıp shıǵılatuǵını atap ótildi. Sonday-aq, usı jıldan baslap, “Jas isbilermenler” chempionatı ótkeriledi. Eń jaqsı 100 ideya tańlap alınıp, hár bir startap ushın 1 milliard sumǵa shekem investiciya kirgiziledi. Bul da jas isbilermenlerimizdiń jumısın bunnan bılay da rawajlandırıwda olarǵa kúsh-ǵayrat hám motivaciya beredi. Ulıwmalastırıp aytqanda, mámleketimiz jetekshisiniń biznes wákilleri menen 5-márte ótkerilgen ashıqtan-ashıq sóylesiwi isbilermen hám fermerlerimizdiń finanslıq imkaniyatın keńeytiwge, eksport potencialın jáne de arttırıwǵa hám qosımsha jańa jumıs orınların jaratıwda úlken áhmiyetke iye.

Guljan Xalmuratova,
Oliy Majlis Nızamshılıq palatasınıń deputatı,
ÓzLiDeP frakciyası aǵzası.
Qaraqalpaqstan xabar agentligi