Házirgi global sanlı rawajlanıw procesinde jasalma intellekt texnologiyaları turmıstıń túrli tarawlarına jedel kirip barmaqta. Bul bolsa tek ǵana innovaciyalıq imkaniyatlardı emes, al ádep-ikramlılıq normalarına ámel etiw, insan huqıqların qorǵaw hám qáwipsizlikti támiyinlew sıyaqlı áhmiyetli máselelerdi de kún tártibine shıǵarmaqta.

Sonlıqtan, xalıqaralıq shólkemler, sonıń ishinde, UNESCO tárepinen jasalma intellektti juwapkershilikli hám ashıq-aydın engiziw boyınsha bir qatar baslamalar ámelge asırılmaqta. Ózbekstan da bul processte belsene qatnaspaqta.
Tashkent qalasında UNESCOnıń baslaması menen “Ózbekstanda jasalma intellektke tayarlıqtı bahalaw metodologiyası” izertlewiniń ashılıw máresimi bolıp ótti.
Ilajda Sanlı texnologiyalar ministriniń birinshi orınbasarı Oleg Pekos qatnastı hám óziniń shıǵıp sóylegen sózinde joybardıń áhmiyetine toqtap ótti. Onıń atap ótiwinshe, bul izertlew mámleketimizde jasalma intellektti juwapkershilikli hám ashıq-aydın tárizde engiziw, ádep-ikramlılıq normaların támiyinlew hám global normativlik qaǵıydalarǵa beyimlesiwde ayrıqsha áhmiyetke iye.
Atap ótiliwinshe, usı jılı 30-oktyabrden 13-noyabrge shekem Samarqand qalasında UNESCOnıń bas konferenciyası bolıp ótiwi rejelestirilgen.

Nigora Rahmonova, ÓzA