Egizeklerdiń tuwılıwı siyrek ushırasatuǵın biologiyalıq process esaplanadı. Bunday hámiledarlıq dawamında ana organizminde bir waqıttıń ózinde 2, 3 yamasa onnan artıq hámile rawajlanadı. Egizeklerdiń tuwılıwında násillik faktorlardıń da ornı júdá úlken. Mámleketimizde egizekler tuwılıw kórsetkishi biraz joqarı. Milliy statistika komitetiniń maǵlıwmatlarına bola, 2025-jıldıń yanvar-iyun aylarında Ózbekstan boyınsha jámi 9 mıń 738 egiz bala dúnyaǵa kelgen.
Egizekler tuwılıwı demografiyalıq statistika ózgerisleriniń siyrek ushırasatuǵın kórsetkishlerinen biri bolıp, ol medicinalıq járdem sapasınıń rawajlanıwı, ana hám bala salamatlıǵınıń jaqsılanıwı menen de baylanıslı. Egizek nárestelerdiń tuwılıwı aymaqlar kesiminde sezilerli parıqlarǵa iye. Bul ayırmashılıqlardı, óz gezeginde, aymaqlardaǵı medicinalıq xızmetlerdiń sapası, xalıqtıń jasaw sharayatları, sociallıq-ekonomikalıq jaǵday hám basqa da kóplegen faktorlar menen túsindiriw múmkin.
Egizekler tuwılıw kórsetkishin aymaqlar kesiminde bólistiretuǵın bolsaq, Qaraqalpaqstan Respublikası – 451, Ándijan wálayatı – 883, Buxara wálayatı – 486, Jizzaq wálayatı – 410, Qashqadárya wálayatı – 1054, Nawayı wálayatı – 233, Namangan wálayatı – 778, Samarqand wálayatı – 1 197, Surxandárya wálayatı – 856, Sırdárya wálayatı – 258, Tashkent wálayatı – 686, Ferǵana wálayatı – 1 172, Xorezm – 544, Tashkent qalası – 730 tı quraydı.
Joqarıdaǵı maǵlıwmatlarǵa bola, eń kóp egizek náresteler Samarqand hám Ferǵana wálayatında tuwılǵan. Bul aymaqlarda xalıqtıń tıǵızlıǵı hám basqa da sociallıq faktorlar egizekler tuwılıw kórsetkishiniń joqarılıǵına tiykar boladı. Qashqadárya wálayatı da bul dizimde joqarı kórsetkishlerge iye bolıp, 1 054 egiz bala tuwılǵan. Eń az egiz bala tuwılǵan aymaqlar sıpatında Nawayı hám Sırdárya wálayatları kórsetilgen. Bul aymaqlarda xalıqtıń azlıǵı yamasa basqa demografiyalıq faktorlar buǵan sebep bolıwı múmkin.

Ózbekstan Respublikası aymaqlarında egizekler sanınıń bunday ayırmashılıǵı, demografiyalıq processlerdi tereńirek úyreniw hám bunnan bılay da jetilistiriw ushın úlken áhmiyetke iye. Sonday-aq, ana hám bala salamatlıǵın jaqsılaw, medicinalıq járdemniń sapasın arttırıw baǵdarındaǵı háreketler jáne de nátiyjeli bolıwı ushın aymaqlar kesiminde ayrıqsha itibar qaratıw zárúr.

ÓzA