Oman Patshalıǵınıń “Omandaily”, “Shuoon” sıyaqlı bir qatar jetekshi basılımları Ózbekstan investiciyalar, sanaat hám sawda ministri Laziz Qudratovtıń basshılıǵındaǵı delegaciyanıń usı mámleketke saparın keńnen sáwlelendirmekte.

Wákillerimiz sapar sheńberinde Maskat qalasında joqarı mártebeli mámleketlik hám isbilermen toparı wákilleri – sawda, sanaat hám investiciyanı xoshametlew ministri Qays Al Yusuf, Investiciya agentligi bısshısı Abdussalam Al-Murshidiy, Awıl xojalıǵı, balıqshılıq hám suw resursları ministriniń orınbasarı Ali Al-Arbiy, sonday-aq, “Suhail Bahwan Group”, “Sohar International Bank”, “Oman Cables”, “Asyad Group”, “MB Holding” sıyaqlı jetkshi kompaniyalardıń basshıları menen ushırastı.
Ushırasıwlar dawamında Ózbekstan tárepi neft-gaz ximiyası, energetika, awıl xojalıǵı, toqımashılıq, taw-kán, avtomobil qurılısı, azıq-awqat sanaatı, logistika hám turizm tarawlarında tayar programmalıq baslamalardı usınıs etti.
Mámleketimizdiń investiciyalıq ortalıǵına baylanıslı tárepler – investorlardı qorǵaw kepilligi, salıq hám bajıxana jeńilligi, sanaat zonalarındaǵı preferenciyalar hám strategiyalıq joybarlar ushın arnawlı tártip tolıq túsindirildi.
Sóylesiwlerdiń juwmaǵında tiykarǵı tarmaqlarda jańa birgeliktegi joybarlardı ámelge asırıw boyınsha kelisimge erisildi. Tárepler uzaq múddetli qatnasıq ornatıwǵa tayar ekenligin bildirdi. Bul processte tiykarǵı itibar birgeliktegi investiciya, infrastrukturanı rawajlandırıw hám sawdanı diversifikaciyalawǵa qaratıladı.
Ilaj sheńberinde Ózbekstannıń Omanǵa investiciya kirgiziw imkaniyatı, Patshalıq tárepinen investorlarǵa usınıs etiletuǵın jeńillikler kórsetilgen kórgizbeli prezentaciya ótkerildi. Maqalada investiciyanı xoshametlew, investorlardıń rezidentligi baǵdarlaması, arnawlı ekonomikalıq hám erkin zonalarda jaratılǵan qolaylıqlar haqqında aytıp ótilgen.

Muharrama Pirmatova, ÓzA