Tashkentte “Ózbekstan, Ázerbayjan hám Evropa: ulıwma rawajlanıw jolında birge islesiw” temasında joqarı dárejedegi ushırasıw dawam etpekte.

ÓzAnıń xabarshısı konferenciyada qatnasıp atırǵan Latviya hám Serbiya Respublikalarınıń burınǵı jetekshileriniń pikirlerin jazıp aldı.
Valdis Zatlers, Latviya Respublikasınıń burınǵı (2007-2011-jıllar) Prezidenti:
– Ózbekstan ekonomikası jedel rawajlanıp atırǵan, xalqı tıǵız jaylasqan mámleket sıpatında Oraylıq Aziyanıń rawajlanıwında hár tárepleme jetekshi orın iyelewge uqıplı. Házirgi processte regionallıq birge islesiw úlken tabıslar gilti, ekonomikalıq rawajlanıw, xalıqtıń abadanlıǵına erisiw girewine aylanıwı múmkin. Ásirese, puqaralardıń kúndelikli turmısında haqıyqıy unamlı ózgerislerdi seziw áhmiyetli. Ózbekstanǵa hár on jılda kelip turaman hám hár saparı unamlı ózgerislerdi kórip atırman. Bul meni jáne hám jáne elińizge sapar etiwge iytermeleydi.
Bul konferenciyadan gózlengen maqset – bir-birimiz benen júzbe-júz sóylesiw. Evropa Awqamı, Kavkaz mámleketleri hám álbette jergilikli ekspertler jámiyetshiliginiń wákilleri tınıshlıq, turaqlılıq hám isenimge tiykarlanǵan regionlararalıq birge islesiwdi jolǵa qoyıw usılların dodalamaqtamız. Global anıqsızlıq sharayatında qarama-qarsılıq emes, al birge islesiw abadanlıqqa alıp keletuǵını anıq.
Ózbekstannıń tásiri Oraylıq Aziyanıń barlıq mámleketlerinde seziledi. Tariyxıy kózqarastan bul jer tárbiyalaǵan ullı shaxslar dúnya civilizaciyasına áhmiyetli úles qosqan. Biz mádeniy miyras orayları – Samarqand, Buxara, Xiywanı rawajlanıw tiykarı sıpatında qádirleymiz.
Jáne bir gáp: hár qanday úlkege uzaqtı kóre alatuǵın jetekshi kerek. Usınday jetekshisi bolǵan mámleket jedel rawajlanıw imkaniyatına iye boladı. Basshı ushın bolsa reforma hám regionallıq birge islesiw elge ne beretuǵının jámiyetke túsindiriw, ózgerislerdi sezinip barıw, ideyalardı turmısqa engiziw jolında belgili bir mártlikke iye bolıw oǵada áhmiyetli.
Usı kózqarastan Ózbekstan Prezidenti Shavkat Mirziyoev milliy ekonomikanı reformalaw hám liberallastırıw jolın tańlap, dúnya boylap hár qıylı qıyınshılıqlar hám turaqsızlıq kúsheyip atırǵanına qaramastan, turaqlı joqarı ósiw pátin támiyinlep kelmekte.
Tashkent hám basqa da qalalardıń kóshelerinde seyil etip, adamlardıń kóterińki keypiyatın, rawajlanıwǵa bolǵan isenimin sezesiz. Haqıyqat sulıw sózde emes, al ápiwayı adamlardıń sanasında qáliplesedi. Ózbek xalqı, kórip turǵanıńızday, alıp barılıp atırǵan reformalardan razı.
Oraylıq Aziya, ásirese, xalqı sanı boyınsha regiondaǵı eń iri mámleket esaplanǵan Ózbekstan ushın bul úlken áhmiyetke iye. Qatań isenim, ámeliy joybarlar hám uzaq múddetli kún tártibi ulıwma tabıs ushın tiykar bola aladı.
Boris Tadich, Serbiya Respublikasınıń burınǵı (2004-2012) Prezidenti:
– Ózbekstannıń tariyxı ullı hám házir de bul úlke tek ǵana Oraylıq Aziya emes, al pútkil dúnya ushın sheksiz áhmiyetke iye. Region búgingi kúnde dúnyada geostrategiyası ushın eń názik aymaqlardan biri bolıp esaplanadı. Demek, Ózbekstannıń tásirisiz Oraylıq Aziyanıń turaqlılıǵın, rawajlanıwın kóz aldımızǵa keltirip bolmaydı. Men tek ǵana siyasat emes, al sanlastırıw, ekonomikalıq rawajlanıw, texnologiyalıq rawajlanıw, bilimlendiriw sıyaqlı áhmiyetli tarawlardı da názerde tutıp atırman.
Birinshiden, júdá áhmiyetli demografiyaǵa iye respublikada tuwılıw dárejesi joqarı, xalıq jas hám global rawajlanıw procesinde tikkeley qatnasıwdı qálewshi joqarı maqsetli adamlar kóp.
Insaniyat tariyxındaǵı eń áhmiyetli dáwirlerde Ózbekstan xalqı áhmiyetli orın iyelegen. Hám házirgi kúnde Prezident Shavkat Mirziyoev jáne de úlken zamanagóy reformalardıń basında tur. Biz bunı júdá qádirleymiz.
Kaspiy teńiziniń eki tárepinde siyasat, energetika, texnologiya, global tınıshlıq kózqarasınan bizge oǵada jaqın dos bola alatuǵın eki mámleket bar ekenin aytıp ótiw orınlı.
Tashkenttegi májiliste túrli mámleketlerden kelgen delegatlar qatnaspaqta. Biz ushın Ózbekstan hám Ázerbayjan, sonıń menen birge, basqa da mámleketler hám kóp tárepleme institutlar menen sóylesiw alıp barıwdı qáleymiz.
Bul forum hár tárepleme nátiyjeli bolıwı ushın bar imkaniyattan paydalanamız. Gózzal mámleketlerimizdiń aydın keleshegin támiyinlewge óz pikirimiz, kózqaraslarımız benen úles qospaqshımız.

ÓzAnıń xabarshısı Wtkir ALIMOV tayarladı.