Awıllıq aymaqlardı sociallıq rawajlandırıwǵa qaratılǵan reformalar mámleketimizde izbe-iz dawam etpekte. Tarawǵa qaratılıp atırǵan itibar, ásirese, bilimlendiriw tarmaǵı infrastrukturasın jaqsılaw arqalı ayqın kózge taslanbaqta. Mine, usınday háreketlerdiń nátiyjesinde aymaqlarda jańa mektep, baqsha, poliklinika sıyaqlı áhmiyetli sociallıq obektler qurılmaqta.

Usı maqsette qabıl etilgen Ózbekstan Respublikası Prezidentiniń 2021-jıl 18-sentyabrdegi PQ-5246-sanlı qararı tiykarında “Awıllıq jerlerdi turaqlı rawajlandırıw” joybarı sheńberinde túrli aymaqlarda qurılıs jumısları ámelge asırılmaqta.
Beruniy rayonı Abay awıl puqaralar jıyını aymaǵında 90 orınǵa mólsherlengen jańa mektepke shekemgi bilimlendiriw shólkeminiń qurılıp atırǵanı bul háreketlerdiń gezektegi ámeliy kórinisi bolıp esaplanadı. Joybar ushın 4 milliard sum qarjı ajıratılıp, házirgi waqıtta qurılıs jumısları jedel pátlerde alıp barılmaqta. Jańa baqshanıń qurılıwı nátiyjesinde usı aymaqta jasap atırǵan shańaraqlar ushın perzentlerin baqshaǵa jaylastırıwda qolaylıqlar jaratıladı.
Aymaqlardaǵı sociallıq infrastrukturanı bekkemlew jolındaǵı bunday baslamalar xalıqtıń turmıs sapasına unamlı tásir kórsetip, awıllıq jerlerde de qolaylı hám zamanagóy sharayatlardı jaratıwda úlken áhmiyeti iye bolmaqta.

Qaraqalpaqstan xabar agentligi