Qaraqalpaqstan Respublikası Joqarǵı Keńesinde Isbilermenler kúni múnásibeti menen bir topar belsendi isbilermenlerdi sıylıqlaw máresimi bolıp ótti.

Onda Qaraqalpaqstan Respublikası Ministrler Keńesiniń Baslıǵı F.Ermanov shıǵıp sóylep, Prezidentimiz tárepinen búgingi kúnde oǵada áhmiyetli bolǵan isbilermenlik jumısın keńeytiw hám jańa joybarlardı ámelge asırıw ushın qolaylı sharayatlar jaratıw, isbilermenlikti rawajlandırıwǵa tosqınlıq etip atırǵan mashqalalardı saplastırıw boyınsha turmısqa engizilip atırǵan baslamalar, qabıl etilip atırǵan párman hám qararlarǵa keńnen toqtap ótti.
Ilajda atap ótilgenindey, sońǵı jıllarda Qaraqalpaqstan ushın óz aldına qabıl etilgen qarar hám pármanlar regionda isbilermenlikti rawajlandırıw, investiciyalıq tartımlıqtı arttırıw hám ekonomikalıq ósimdi támiyinlewde bekkem tiykar bolıp xızmet etpekte. Qısqa waqıt ishinde jańadan-jańa obektler iske túsirilip, iri kólemdegi investiciyalıq joybarlar ámelge asırılmaqta.
Bayram ilajında Prezidentimizdiń arnawlı pármanları tiykarında sıylıqlanǵan Kegeyli rayonındaǵı “Arzıw” kóp tarmaqlı fermer xojalıǵınıń baslıǵı Palzada Salievaǵa «Dwstlik» ordeni, Tórtkúl rayonındaǵı “115-Tórtkúl avtokárxanası” juwapkershiligi sheklengen jámiyetiniń shólkemlestiriwshisi Ǵayratdin Kerimbaev hám Nókis qalasındaǵı “Good Cafe” shańaraqlıq kárxanasınıń basshısı Maxira Mamutovaǵa «Shuhrat» medalı, sonday-aq, 6 belsendi isbilermenge “Faol tadbirkor” kókirek belgisi saltanatlı túrde tapsırıldı.
Bunnan tısqarı, Joqarǵı Keńes Prezidiumı qararı menen bir qatar isbilermenler Joqarǵı Keńestiń kókirek belgileri, Húrmet jarlıqları hám bahalı sawǵalar menen sıylıqlandı.

Qaraqalpaqstan xabar agentligi