20-avgust-Isbilermenler kúni

Búgin bazar ekonomikasında báseki kúshli bolıp turǵan bir payıtta xalıqtıń kewlinen shıǵatuǵın ónimleriń menen ǵana bizneste óz ornıńa iye bolıwıń múmkin. Óz brendine iye iri kompaniyalar menen birge bir neshe óndiris kárxanaları básekige tolı maydanda názik talǵamlı qarıydarlar ushın óziniń sapalı ónimleri menen kewlinen jay alıp, at shıǵarıp kelmekte. Qaraqalpaqstannıń belgili konditer brendi – «Cake Bumer» de usınday kárxanalardıń biri.

Hár qanday iri brendtiń artında insannıń erk-ıqrarı, shıdamlılıǵı hám miyneti turadı. Onıń tiykarın salıwshısı, belgili isbilermen Maxira Mamutova tek ǵana mazalı zatlar arqalı mıńlaǵan insanlardıń kúndelikli turmısına quwanısh alıp kirip qoymastan, al júzlegen hayal-qızlar hám jaslar ushın turaqlı jumıs orınların jaratıp kelmekte.
Tórtkúl rayonında tuwılıp ósken Maxira Mamutova taza miynet ortalıǵında, milliy qádiriyatlarǵa súyengen awızbirshilikli shańaraqta kamalǵa keldi. Jańa ómirge qádem taslaǵan qız Qaraqalpaq mámleketlik universitetinde oqıp, filologiya baǵdarı boyınsha joqarı maǵlıwmatlı qánige boldı.
Filolog bolsa da onıń ómir jolı bilimlendiriwden tısqarı isbilermenlik hám jámiyetlik jumıs penen de úzliksiz baylanıslı boldı. Bir neshe jıl mektepte muǵallim bolıp islegen Maxira tez arada ózin biznes tarawında sınap kóriwge qarar etti.
«Cake Bumer» diń dáslepki qádemleri qalay baslanǵan?
2007-jıl… Xojeli rayonındaǵı óz úyi. Stol ústinde konditer ónimleri, qasında bir jumısshı hám úlken ármanlar. Mine, usı sharayatta «Cake Bumer»diń dáslepki qádemleri baslandı. Dáslepki ónimler – tortlar, chizkeyk hám pecheneler… Olar óziniń original recepturası hám sulıw kórinisi menen jergilikli bazarda tez belgili bola baslaydı.
Bir jıldaǵı miynet keyin ala úlken tarmaqqa tiykar boldı. Ónimleri menen ishki bazarda óz ornına iye bolıp baslaǵan isbilermen 2013-jılı Nókis qalasında birinshi sawda shaqapshasın ashıwǵa erisedi. Bul waqıya kompaniya ushın jańa basqısh boldı hám brend xalıqtıń kewlinen shıǵa baslaydı.
Rawajlanıw hám keńeyiw
«Cake Bumer»diń ayaqqa turıw jolı ańsat bolmadı. Finanslıq qıyınshılıqlar, bazardaǵı báseki, sapa talapları – bulardıń barlıǵı úlken sabırlılıq hám mártlikti talap etti. Biraq Maxira qıyınshılıqlardan qorıqpadı, kerisinshe, olardı jańa imkaniyatqa aylandıra aldı.
2018-jıldan baslap «Cake Bumer» zamanagóy óndiris cexlarına iye boldı. Keyin ala Nókis, Xojeli hám Qońıratta jámi 5 sawda hám ulıwma awqatlanıw shaqapshaları jumıs alıp bardı.
Házirgi waqıtqa shekem kompaniya 100 den aslam rásmiy jumıs orınların jarattı, 30 dan aslam miynet migrantın sırt elden qaytarıp, turaqlı jumıs penen támiyinlewge eristi.
Ilham hám tayanısh deregi
Hár qanday isbilermenlik jolında tabısqa erisiw ushın tek ǵana bilim hám miynet emes, al úlken ruwxıy tayanısh ta zárúr. Maxiranıń ómir jolı da buǵan ayqın mısal.
Onıń aytıwınsha, bárinen burın barlıq ırısqı-nesiybe hám tabıs – Alladan. Sonıń menen birge, onıń tınımsız háreketleri, sabırı hám miyneti bul jolda sheshiwshi faktor boldı. Ol ózin isbilermenlikte bekkem qádem menen júriwge iytermelegen tiykarǵı kúshti ata-anasınıń pátiyası hám ómirlik joldasınıń iseniminen tapqan. Ata-anası oǵan miynet súygishlik, hadallıq hám sabır-taqatlılıqtı úyretken bolsa, ómirlik joldası bolsa barlıq qıyınshılıq, qorqınısh hám táwekelshilik penen baslaǵan islerinde haqıyqıy iyinles hám súyenish bolıp keldi.
Sociallıq juwapkershilik; Hayal-qızlar hám jaslardı qollap-quwatlaw
«Cake Bumer» tek ǵana biznes emes, al úlken sociallıq mektep bolıp esaplanadı. Xızmetkerlerdiń 80 procentten aslamın hayal-qızlar quraydı. Maxira olar ushın arnawlı jumıs úyretiw hám tájiriybe arttırıw baǵdarlamasın jolǵa qoyǵan.
Jaslar da bul jerde óz jolın tawıp atır. Máwsimlik jumıs orınları arqalı studentler hám járdemge mútáj shańaraqlardıń perzentleri oqıwdan tısqarı waqıtlarda hám jazǵı dem alıs kúnleri waqtınsha islep tájiriybe toplaw imkaniyatına iye bolmaqta.
Hár jılı «Cake Bumer» baslaması menen xızmetkerlerge hám olardıń perzentlerine mektep quralları, kiyim-kenshekler sawǵa etiledi. Bul – kompaniyanıń joqarı sociallıq juwapkershilikke iye ekenliginen dárek beredi.
2024-jıldan baslap ol 25-sanlı “Bayterek” saylaw okruginen Xalıq deputatları Nókis qalalıq keńesine deputatlıqqa saylandı. Deputat sıpatında ol kem támiyinlengen hám mayıplıǵı bolǵan shańaraqlarǵa járdem kórsetiw, jollardı abadanlastırıw, piyadalar jolların qurıw hám hayal-qızlardı isbilermenlikke tartıw baǵdarında jedel jumıs alıp barmaqta.
Hár qanday miynet itibardan shette qalmaydı
Qaraqalpaqstan Respublikasında isbilermenlik jumısın keń en jaydırıw menen birge, shańaraqlıq qádiriyatlardı úylesimli rawajlandırıwda ayrıqsha miyneti hám baslamaları menen kózge túsip kiyatırǵan Maxira Mamutovanıń miynetleri Húkimetimiz tárepinen múnásip bahalanıp, usı jıl 15-may kúni – «Xalıqaralıq shańaraq kúni» múnásibeti menen Tashkent qalasında ótkerilgen saltanatlı ilajda “Ibratlı shańaraq” kókirek belgisi menen sıylıqlandı.
Sonday-aq, 8-mart Xalıqaralıq hayal-qızlar kúni múnásibeti menen Qaraqalpaqstan Respublikası Joqarǵı Keńesiniń Baslıǵı A. Orınbaev tárepinen oǵan “Watan pidayısı” kókirek belgisi saltanatlı túrde tapsırıldı.
Jaqında ǵana Prezidentimizdiń 20-avgust “Isbilermenler kúni» múnásibeti menen taraw wákillerinen bir toparın sıylıqlaw haqqında”ǵı Pármanı tiykarında Xojeli rayonındaǵı “Cake bumer” jámiyeti basshısı, bir waqıttıń ózinde Nókis qalasındaǵı “Good Cafe” shańaraqlıq kárxanası baslıǵı bolıp jumıs alıp barıp atırǵan ol “Shuhrat” medalı menen sıylıqlandı.
Bul sıylıqlar zamanagóy isbilermen hayaldıń tek ǵana isbilermenlikte emes, al shańaraq, mánawiyat hám jámiyettiń rawajlanıwında da úlgi sıpatında tán alınǵanın kórsetedi.
Juwmaq
Búgin «Cake Bumer» – Qaraqalpaqstandaǵı eń iri konditer brendlerinen biri. Onıń artındaǵı isbilermen hayal Maxira isbilermen sıpatında júzlegen jumıs orınların jarattı, deputat sıpatında júzlegen shańaraqlarǵa járdem berdi, ana sıpatında bolsa tórt perzentti tárbiyalap kamalǵa keltirmekte. Prezidentimiz tárepinen «Shuxrat» medalı menen sıylıqlanǵan Maxira jańa baslamalar menen jáne de ruwxlanıp, biznesin ele de rawajlandırıw jolında qádem taslamaqta.
-Táwekelshilikten qorıqpaw kerek. Táwekelshilik penen baslanǵan biznes jolı xalıq penen tıǵız baylanıslı bolıwǵa, jańa imkaniyatlarǵa jetkerdi. Sonıń ushın hár bir hayal-qızǵa aytarım, elimizde isbilermenlikti rawajlandırıw ushın jaratılıp atırǵan imkaniyatlardan orınlı paydalanıwdı hám qorıqpastan óz biznesin baslawın másláhát eter edim,-deydi ol.
«Cake Bumer» – bul mazalı zatlar brendi emes, al bir hayaldıń miynet, erk-ıqrar hám muhabbat penen jaratqan ómirlik ápsanası bolıp esaplanadı. Bul jolda onıń qasında kúshli jámáát jámlesken. Olardıń aldında tek ǵana bir maqset bar, olda bolsa xalıqqa sapalı ónim jetkeriw hám jaqsı kúnlerine quwanısh baǵıshlaw.

Gúlnara Turdıshova, Qaraqalpaqstan xabar agentligi