Kadastr agentligi hám Mámleketlik kadastrlar palatası Qaraqalpaqstan Respublikası basqarmaları tárepinen ǵalaba xabar qurallarınıń wákilleri ushın press-tur shólkemlestirilip, jurnalistler Nókis qalasındaǵı Góne qala MPJda taraw qánigeleri tárepinen ámelge asırılıp atırǵan xatlaw jumıslarınıń barısı menen tanıstı.

Házirgi waqıtta Ózbekstan Respublikasınıń “Ózbasımshalıq penen iyelep alınǵan jer uchastkalarına hám olarda qurılǵan imaratlarǵa bolǵan huqıqlardı tán alıw haqqında”ǵı nızamınıń orınlanıwı boyınsha Mámleketlik kadastrlar palatasınıń Qaraqalpaqstan Respublikası basqarması hám onıń rayonlıq, qalalıq filialları tárepinen keń kólemli xatlaw jumısları alıp barılmaqta. Ǵalaba xabar quralları wákilleriniń qatnasıwında taraw qánigeleri úyme-úy júrip puqaralar arasında kadastr tarawındaǵı jańalıqlar, turaq jaylarında ózgerisler yamasa qosımsha qurılmalar salınsa onı hújjetlestiriwdiń tártip-qaǵıydaları haqqında túsinik jumısların alıp bardı. Jurnalistler jumıs barısında kadastr qánigeleriniń turaq jaydı ólshewi, hújjetlestiriw processleri menen tanısıp, qızıqtırǵan sorawlarına juwap aldı.
2025-jılı 166 máhállede xatlaw jumıslarınıń ámelge asırılıwı belgilengenligin atap ótiwimiz orınlı. Usı nızamnıń orınlanıwına aymaqlarda jámi 175 xızmetker tartılǵan. Bunnan tısqarı Mámleketlik kadastrlar palatası Qaraqalpaqstan Respublikası basqarmasında jumısshı topar dúzilgen. Búgingi kúnge shekem 48 498 kóshpes múlk obektleri xatlawdan ótkerildi. 34277 obekt haqqındaǵı maǵlıwmatlar UZKAD málimleme sistemasına júklengen hám 18640 obekt “E’tirof” avtomatlastırılǵan sistemasına ótkerilgen, 14992 obekt házirgi waqıtta dodalaw procesinde, 2401 obekt haqqındaǵı maǵlıwmatlar Kadastr agentliginiń rásmiy kadastr.uz saytında hám mákan puqaralar jıyınlarında járiyalandı. 561 obekt Ádillik uyımları tárepinen úyrenilmekte, 23 obekt boyınsha komissiya tárepinen múlk huqıqın tán alıwdan bas tartılǵan, 142 kóshpes múlk redaktorlaw procesinde, 176 obekt iyeleriniń nızamda kórsetilgen bir mártelik tólemlerin tólewi kútilmekte, 54 kóshpes múlk boyınsha huqıqların tán alıw ushın deputatlar keńesiniń qararlarına kirgizilgen.
– Nızamǵa bola, unamlı juwmaq qabıl etilgen puqaralarǵa Kadastr agentligi tárepinen bir mártelik tólemdi ámelge asırıw boyınsha sms-xabarnama jiberiledi,-deydi Mámleketlik kadastrlar palatası Qaraqalpaqstan Respublikası basqarmasınıń baslıǵı S.Urunbaev.
Xabarlandırıw tiykarında bir mártelik tólemdi ámelge asırǵanlarǵa hár sherekte xalıq deputatları Keńesiniń qararı menen huqıqlar tán alınadı. Búgingi kúnde unamlı juwmaqlar alǵan 176 puqaraǵa tólem boyınsha sms-xabarnama jiberilgen bolıp, búgingi kúnde múlk iyeleri tárepinen tólemlerdi ámelge asırıw procesinde tur. Puqaralar tárepinen bir mártelik tólemler ámelge asırılǵannan soń kóshpes múlk obektlerine múlk huqıqların tán alıwǵa erisiw múmkin boladı.
Puqaralarımız tárepinen bir mártelik tólemlerdi tólewdi keshiktiriwleri iyelik huqıqın alıw múddetin sozbaqta hám bul óz-ózinen nızam orınlanıwın támiyinlewdegi múddetlerdiń buzılıwına sebep bolıp qalmaqta.
Puqaralarımızdan usı nızam menen mámleketimiz basshısı tárepinen jaratıp berilgen qolaylıq hám imkaniyatlardan utımlı paydalanıp qalıwın, múlklerine tán alınǵan huqıqlardı rásmiylestirip alıwı ushın bir mártelik tólemlerin waqtında tólep beriwin sorap qalamız.
Kadastr agentligi Qaraqalpaqstan Respublikası basqarmasında baspasóz konferenciyası ótkerilip, qatnasıwshılarǵa tarawda ámelge asırılıp atırǵan jumıslar tuwralı maǵlıwmat berildi.
Atap ótilgenindey, Kadastr agentligi, Mámleketlik kadastrlar palatasınıń Qaraqalpaqstan Respublikası basqarmalarınıń qánigeleri tárepinen 2025-jıl dawamında Nókis qalasınıń 28 máhállesinde xatlaw jumısları ámelge asırılıwı belgilengen. Usı jıldıń 18-avgust kúngi jaǵdayına bola 6105 kóshpes múlk obektleri xatlawdan ótkerilip, 1584 obekt “E’tirof” málimleme sistemasına kirgizildi. 3786 obekt haqqındaǵı maǵlıwmatlar UZKAD málimleme sistemasına júklengen hám 1584 obekt “E’tirof” avtomatlastırılǵan sistemasına ótkerilgen, 1417 obekt házirgi waqıtta dodalaw procesinde, 165 obekt haqqındaǵı maǵlıwmatlar Kadastr agentliginiń rásmiy kadastr.uz veb-saytında hám mákan puqaralar jıyınlarında járiyalandı. 2 obekt Ádillik uyımları tárepinen úyrenilmekte.
Baspasóz konferenciyasında qatnasıwshılar qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.