Aldın xabar berilgenindey, házirgi waqıtta “Yuksalish” háreketi tárepinen, Ózbekstan Notarial palatası menen birgelikte “Notariuslerden biypul huqıqıy bilimler!” súreni astında gezektegi akciya ilajları ótkerilmekte.

Maqset – puqaralardıń huqıqıy mádeniyatın arttırıw, xalıq penen pikirlesiw mexanizmin jaratıw, huqıqtı qollanıw tarawında mashqalalardı anıqlaw hám olardı saplastırıwǵa qaratılǵan pikir-usınıslardı tayarlaw, sonday-aq, puqaralarǵa hár qıylı huqıqıy mashqalalı máselelerde ámeliy járdem kórsetiwden ibarat.
Akciyanıń ekinshi kúni Qaraqalpaqstan Respublikası Qorǵanıw basqarmasında ótkerildi. Onda Qaraqalpaqstan Respublikası Qorǵanıw basqarması baslıǵınıń orınbasarı, mayor A.Yarmatov, “Yuksalish” háreketi Qaraqalpaqstan Respublikası aymaqlıq bóliminiń baslıǵı T.Romanov, Notarial palatası Qaraqalpaqstan Respublikası aymaqlıq basqarmasınıń másláhátshisi M.Narbaev hám jeke menshik notariuslar – Jeńisbay Aytmuratov hám Mansur Nuraddinovlar qatnastı.
Ilajda áskeriy bólimde xızmet etip atırǵan 130 dan aslam áskerler qatnastı.
Ilajda notariuslar tárepinen akciya qatnasıwshılarınıń notarial tastıyıqlanǵan hújjetlerge teńlestirilgen isenim xatın, wásiyatnamanı rásmiylestiriw hám onlayn notarial háreketler boyınsha huqıqıy túsindiriw hám notariat tarawına baylanıslı temalarda bayanatlar ótkerildi hám qatnasıwshılarǵa huqıqıy másláhátler berildi.
Ilaj juwmaǵında jámi 15 puqaraǵa huqıqıy másláhátler berildi. Sonnan altawı miyras máselesinde hám toǵızı basqa notarial háreketler boyınsha boldı.
Maǵlıwmat ushın, “Yuksalish” háreketi hám Notarial palata arasındaǵı birge islesiw 2020-jıl sentyabr ayında eki shólkem arasında qol qoyılǵan Memorandum sheńberinde jolǵa qoyılǵan. Usı waqıtqa shekem puqaralardıń huqıqıy sanası hám huqıqıy mádeniyatın arttırıw, notariat tarawın reformalaw procesine puqaralıq jámiyeti institutlarınıń wákilleri, ekspert hám ilimpazlardı jedel tartıw, sonıń ishinde, qayırqomlıq ilajları hám orınlarda úgit-násiyatlaw jumısların ótkeriw menen birge islesiwdi rawajlandırıw boyınsha kelisimlerge erisildi.
Akciya 2020-jıldan baslap 6 jıl dawamında ámelge asırılıp, qamtıp alıw 2020-jılı 607, 2021-jılı 1166, 2022-jılı 2235, 2023-jılı 4140, 2024-jılı 4320 puqaraǵa kóbeygen. Bıyıl da 5000 ǵa shamalas puqaraǵa biypul másláhátler beriw rejelestirilgen.

Á.Jiyemuratov,
Qaraqalpaqstan xabar agentligi
M.Habibullaevtıń túsirgen súwretleri