Nashvatı almurtı (Aziya almurtı, Nashi, Pyrus pyrifolia) Shıǵıs Aziya mámleketlerinen kelip shıqqan bolıp, Yaponiyada “Nashı almurtı” atı menen belgili.

Miywesi domalaq, alma tárizli, qabıǵı sarı-jasıl, ústinde mayda aq noqatları bar. Dámi mazalı hám suwlı.
Xojeli rayonındaǵı “Mustaqillik” awıl puqaralar jıyını aymaǵında jasawshı Kamil Allambergenov Koreyadan bul almurttı aldırıp, óz baǵına ekken. Házir onıń baǵında 15 túp koreys almurtları bar. Kamil Allambergenovtıń aytıwınsha, bul almurttıń abzallıǵı sonda, ol bir jılda miywege kiredi.
– Maǵan Koreyada jumıs islep júrgen inilerim sol jaqtaǵı almurt baǵın kórsetip, bizlerde de egip kór, dep usınıs berip edi. Nál jiberdi. Bul almurttıń ózgesheligi ol bir jılda miywe berip baslaydı eken. Hár miywesi 1-2 kilogrammǵa shekem boladı eken. Bıyıl miyweni kóp salıp jiberdi. Birlep azayttım. Nálin jetistirip kóbeytip atırman. Bul miywe aǵashınıń jáne bir qásiyeti iyiliwsheń eken. Júzimge uqsatıp asıldırıp qoyıwǵa da boladı,-deydi Kámil Allambergenov.
Jaqsısı bul haqqında diyqannıń ózinen esitsek:

Qaraqalpaqstan xabar agentligi