Jaqında Ekonomika hám qarjı ministrligi Mámleketlik satıp alıwlar siyasatı departamentiniń direktorı Sarvar Nazarov, Aziya rawajlanıw bankiniń mámleketlik satıp alıwlar boyınsha bas qánigesi Julian Dozchi hám AQShtıń “Charles Kendall Consulting” kompaniyası direktorı Skot Dikenniń qatnasıwında eki tárepleme ushırasıw bolıp ótti. Bul haqqında ministrlik málimleme xızmeti málim etti.

Sóylesiwde Ózbekstanda mámleketlik satıp alıwlar tarawında qánigelerdi kásiplik tayarlaw hám olardıń mamanlıǵın turaqlı arttırıw boyınsha tiyisli sistema jaratıwǵa qaratılǵan birgeliktegi joybardı ámelge asırıw máseleleri dodalandı.
Dáslepki basqıshta mámleket kóleminde mámleketlik satıp alıwlar qánigeligine bolǵan qızıǵıwshılıq hám mútájlik, oqıw orayları hám mentorlardıń potencialın tallawǵa baǵdarlanǵan úyreniwlerdi shólkemlestiriw belgilendi. Sonday-aq, juwapker ministrlik hám uyımlar menen birgelikte oqıw qollanbaların islep shıǵıw hám olardı bilimlendiriw mákemeleri oqıw baǵdarlamalarına kirgiziw máselesi de kórip shıǵıldı.
Sarvar Nazarovtıń atap aytqanınday, oqıtıw procesinde sertifikaciya sistemasın engiziw úlken áhmiyetke iye.
-Sertifikaciya tiykarında qánigelerdiń mamanlıǵın bahalaw metodologiyasın islep shıǵıw, sonday-aq, bul wazıypanı ámelge asırıwda wákillikli uyımdı belgilew zárúr. Usı múnásibet penen Ekonomika hám qarjı ministrligi janındaǵı Oqıw orayında qánigelerdi kásiplik tayarlaw, mamanlıǵın arttırıw hám sertifikatlaw processlerin jolǵa qoyıw usınıs etildi, – dedi ol.
Ushırasıw sheńberinde jumısshı topar dúzilip, oǵan jıldıń aqırına shekem joybardı ámelge asırıw boyınsha tiykarǵı wazıypalar hám zárúr ilajlar belgilep berildi. Atap aytqanda, mámleketlik xızmet klassifikatorına “mámleketlik satıp alıwshı qarıydar” kásibin kirgiziw máselesi de dodalandı.
Sóylesiwlerdiń juwmaǵında basqa baǵdarlarda da birge islesiw imkaniyatları tallandı hám keleshekte bul máseleler boyınsha sóylesiwlerdi dawam ettiriwge kelisip alındı.

N.Ziyodullaeva, ÓzA