20-avgust -Isbilermenler kúni

sóz pidayı isbilermen Nadira Qutlımuratova haqqında

Búgingi kúnde elimizde isbilermenlikke jol keń, imkaniyatlar bolsa sheksiz. Ásirese, hayal-qızlarımızǵa jaratılıp atırǵan sharayatlar hám bildirilip atırǵan isenim – olardıń turmısın jańadan baslaw, óz kúshin kórsetiwi ushın bekkem tiykar bolıp xızmet etpekte. Prezidentimizdiń atap ótkenindey, “Hár bir pidayı isbilermen – bul jańa Ózbekstannıń súyenishi, ekonomikamızdıń lokomotivi.”

Usınday pidayı insanlardıń biri beruniyli Nadira Qutlımuratova. Ol óziniń mártligi hám miynet súygishligi menen tek ǵana aymaqqa emes, al pútkil rayonǵa belgili. Nadiranı turmıs sınaqları da jolınan qaytara almadı. Ol 2-topar mayıbı bolıwına qaramastan, “qolımnan kelmeydi” degen sózdi hesh qashan qollanbaǵan. Kerisinshe, ármanlarına tigiw mashinasınıń dawısı menen jol ashtı.

Dáslep úyiniń shetindegi kishkene bólmede, buyırtpa tiykarında máhálle hayallarına kiyimler tikken bolsa, jıllar ótip, qasına úsh-tórt qızdı alıp, kishi cex ashtı. Hár bir pishilgen gezleme, tigilgen kiyim – onıń qálbindegi ármanları, mehir hám maqtanıshınan dárek beretuǵın edi.

Al búgin Nadira rayon kóleminde iri isbilermen sıpatında tanılǵan. Házirgi waqıtta ol jańa, eki qabatlı zamanagóy óndirislik imarattı qurıw aldında. “Maqsetim – imkanı barınsha kóbirek adamdı jumıs penen támiyinlew, tikken kiyimlerim insanlarǵa quwanısh alıp kelsin. Házirshe 25 jumıs ornımız bar, jańa imarat pitkennen keyin 100 jumıs ornın jaratıp, ózim sıyaqlı sociallıq járdemge mútáj hayallardı da bánt etpekshimen,” – deydi ol isenim menen.

Nadiranıń cexında “Hayal-qızlar dápteri” hám “Jaslar dápteri”ne kirgizilgen, kem támiyinlengen shańaraqlardıń qızları da isleydi. Bul bolsa onı tek ǵana isbilermen emes, al elge mehir baǵıshlaytuǵın insan sıpatında kórsetedi.

Ol Ózbekstan Liberal-demokratiyalıq partiyasınıń belsendi aǵzası bolıp, partiya ilajlarında turaqlı qatnasadı. Hár jılı ótkeriletuǵın “Isbilermen hayal” tańlawında óz ónimleri menen joqarı orınlardı iyelep keledi. 2023-jılı “Eń jaqsı biznes joybar” tańlawınıń Qaraqalpaqstan Respublikası basqıshında sıylı ekinshi orındı qolǵa kirgizdi.

20-avgust – mámleketimizde “Isbilermenler kúni” sıpatında belgilenedi. Usı múnásibet penen biz Nadira Qutlımuratova hám barlıq elimiz isbilermenlerin qızǵın qutlıqlaymız. Sizler – jańa Ózbekstannıń dóretiwshileri, arzıw-niyetlerimizge qanat baǵıshlaytuǵın kúshsiz. Jolıńız ashıq, miynetińiz bereketli bolsın!

Amangul ESEMURATOVA , ÓzLiDeP Qaraqalpaqstan Respublikası Keńesi Jámiyet penen baylanıslar, málimleme siyasatı hám úgit-násiyat jumısları bólimi baslıǵı