Deputat xalıq penen húkimet arasındaǵı kópir wazıypasın atqaratuǵın isenimli wákil desek aljaspaymız. Xalıqtıń arasında bolıp olardı qıynap kiyatırǵan mashqalalardı sheshiwge járdemlesiw deputatqa júklengen áhmiyetli wazıypa esaplanadı.

Nókis rayonında saylawshılarınıń bir neshe mashqalaların úyrenip, unamlı sheshiwge erisken Qaraqalpaqstan Respublikası Joqarǵı Keńesiniń deputatı Alisher Djumanazarovtıń baslaması menen jáne bir mashqala óz sheshimin taptı. Yaǵnıy, onıń qáwenderliginde “Bes saǵa” awıl puqaralar jıyınındaǵı xalıqtı quwandırǵan áhmiyetli jumıs ámelge asırıldı. Endi bul awıldaǵı 357 xojalıqtıń úy aldı qıytaq jerlerine suw jetip baratuǵın boldı.
Aldın deputat “Úlgili mákan” mákan puqaralar jıyınında jasawshı puqaralar menen ushırasıw ótkergen edi. Onda “Bes saǵa” awılınıń turǵınları qıytaq jerlerin suwǵarıw imkaniyatı bolmay atırǵanın bildirip, awıl aymaǵınan ótip turǵan “Bes saǵa” kanalı arqalı suw alıp keliw máselesin kótergen. Olar zamanagóy suw nasosı ornatılıwı hám uzınlıǵı 2 kilometr bolǵan jańa jap qazılıwı kerek ekenligin atap ótken.
Másele boyınsha jedel shara kórgen deputat óz qarjıları esabınan bul jumıslarǵa qáwenderlik etti. Ekskavator járdeminde 2 kilometr aralıqta jańa jap qazılıp, zamanagóy suw nasosı barlıq zárúr úskeneleri menen birge ornatıldı.
Bul jańalıq awıl xalqı ushın úlken qolaylıq jarattı. Endi qıytaq jerlerdi nátiyjeli suwǵarıw, kóklemzarlastırıw hám túrli eginler jetistiriw imkaniyatı payda boldı. Bul tek ǵana xalıqtıń turmısında unamlı ózgerislerge sebep bolıp qoymastan, al awıl xojalıǵın rawajlandırıwǵa da xızmet etedi.
Awıl xalqı ózleriniń kóp jıllıq mashqalası sheshilgeninen quwanıshlı. Olar deputat Alisher Djumanazarovqa bildirgen minnetdarshılıǵında, bunday ámeliy jumıslar xalıq wákili sıpatındaǵı haqıyqıy juwapkershiligin kórsetetuǵının atap ótti.

Qaraqalpaqstan xabar agentligi