Xalıqtıń turmıs tárizi hám háreketleniw qáwipsizligin támiyinlewde infrastrukturanıń roli úlken. Aymaqlarda bul baǵdarda ámelge asırılıp atırǵan jumıslar xalıqtıń kúndelikli turmısın jeńilletiwge xızmet etpekte. Usı maqsette Ámiwdárya rayonında jáne bir áhmiyetli qádem qoyıldı – Nazarxan awılında jańa jol ótkeli paydalanıwǵa tapsırıldı.
Bul qurılma «95V021e) «Nazarxan» APJ ǵa (738 km.den)» avtomobil jolınıń 0-1 kilometr aralıǵındaǵı temir jol ústinen ótkerilgen bolıp, transport qurallarınıń úzliksiz háreketin támiyinlewde ayrıqsha áhmiyetke iye. Endi awıl xalqı ushın da háreketleniw bir qansha qáwipsiz hám qolaylı boladı,- dep maǵlıwmat beredi rayon hákimligi Málimleme xızmeti bólimi.
Jol ótkeliniń qurılısına zamanagóy kózqarasta qatnas jasalǵan. Paydalanıwǵa tapsırıw máresiminde rayon hákimi S.Xwjametov, onıń orınbasarları, qurılıs shólkemleri hám jámiyetshilik wákilleri qatnastı. Ilajda hákim bul joybar arqalı xalıq ushın jáne bir qolaylı sharayat jaratılǵanın atap ótti.
Jańa imarat tek ǵana transport aǵımın jeńillestirip qoymastan, al xalıqtıń ulıwma turmıs sapasına da unamlı tásir kórsetedi. Bunday infrastrukturalıq joybarlar aymaqtıń rawajlanıwına xızmet etetuǵını sózsiz.

Qaraqalpaqstan xabar agentligi