Bayramlarda qáwenderlikke mútáj insanlarǵa kórsetilip atırǵan qayırqomlıq ilajlar, elimizdegi tatıwlıqtı, xalıqlar doslıǵın bekkemlewdiń, járdemge mútáj insanlarǵa sociallıq járdem kórsetiwdiń ámeliy kórinisi bolıp esaplanadı. Ózbekstan Respublikası mámleketlik ǵárezsizliginiń 34 jıllıǵı aldınan da usınday qayırqomlıq ilajları dawam etpekte.

Nókisli Natalya Matkarimova rus milletiniń wákili. Ol Nókis qalasında tuwılıp, kámalǵa kelgen. Keńpeyil qaraqalpaq eliniń topıraǵında qatarları menen awızbirshilikli oynap ósti. Bir neshe jıllar dawamında densawlıqtı saqlaw tarawında orta buwın medicina xızmetkeri bolıp xalıqqa xızmet kórsetip keldi.
Tilekke qarsı, Natalyanıń 1995-jılı tuwılǵan perzenti Ruslan Matkarimov balalıǵınan I topar mayıbı. Natalya Matkarimova 30 jıldan berli usı perzentine qarap kelmekte. Perzenti ózin-ózi basqarıw imkaniyatına iye emes. Sonıń menen birge, ol sońǵı jıllarda qantlı diabet keselligine de shatılǵan.
Ózbekstan Respublikası ǵárezsizliginiń 34 jıllıǵı bayramı qarsańında Araldı Qutqarıw Xalıqaralıq qorı Atqarıw komiteti Natalya Matkarimovanıń shańaraǵınan, perzentiniń jaǵdayınan xabar aldı. Mayıplıǵı bolǵan perzentine zárúrli materiallıq járdem kórsetildi.
– Men bul jaqsılıqlardı hesh qashan umıtpayman. Ulım kesel bolıp qalǵanda, qolımnan hesh nárse kelmey, qıynalıp júr edim. Geyde onıń jaǵdayı qattı awırlasıp qaladı. Qarjı azlıǵınan zárúr emlerdi óz waqtında alıw imkaniyatı da bolmadı. Usınday bir payıtta Araldı Qutqarıw Xalıqaralıq qorı Nókis filialı xızmetkerleri esigimdi qaǵıp kirip, jaǵdayımızdan xabar aldı. Jalǵız baslı ananı jalǵızlatıp qoymadı. Olar tek ǵana, qarjılay járdem berip qoymastan, meni ruwxıy jaqtanda da qollap-quwatladı. Mine, usı járdem bizge umit baǵıshladı, perzentimniń ómiri ushın gúresiwime kúsh baǵıshladı. Bizge kórsetilgen qayırqomlıq járdemnen tóbem kókke jetti. Búgin Qaraqalpaqstanda túrli millet wákilleri doslıq hám awızbirshilik penen jasap kelmekte. Men usı eldiń duzın iship, nanın jedim. Men elimizdegi ulıwmainsanıylıq qádiriyattan minnetdarman, al, kórsetilip atırǵan mehir –muhabbattan bolsa, kózime jas keldi,-deydi N.Matkarimova.

Qaraqalpaqstan xabar agentligi.