Paytaxtımızdaǵı “InterContinental Tashkent” miymanxanasında “Ulıwma rawajlanıw jolında birge islesiw” súreni astında Ózbekstan, Ázerbayjan hám Evropa joqarı dárejedegi ushırasıwı baslandı.

Bul abıraylı májilis Nizamiy Gánjawiy xalıqaralıq orayı, Ózbekstan Respublikası Prezidenti janındaǵı Strategiyalıq hám regionlararalıq izertlewler institutı, Strategiyalıq reformalar agentligi hám Sırtqı isler ministrligi tárepinen shólkemlestirilgen.
Itibarlı tárepi, forumda húkimetimiz wákilleri menen birge hár qıylı regionlardan 30 ǵa shamalas burınǵı mámleket hám húkimet basshıları qatnaspaqta. Kún tártibinde Evroaziya mámleketleri strategiyalıq qarım-qatnasın alǵa qoyıw maqsetin gózlegen birge islesiwdiń kóp táreplemeli baǵdarları qamtıp alınǵan.
Forumnıń ashılıwında dáslep mámleketimiz basshısınıń ánjuman qatnasıwshılarına jollaǵan qutlıqlawın Ózbekstan Respublikası Prezidentiniń sırtqı siyasat boyınsha keńesgóyi Abdulaziz Komilov oqıp esittirdi.
– Oraylıq Aziya hám Qubla Kavkaz arasındaǵı baylanıslılıq máseleleri jáne bul eki iri regionnıń Evropa menen birge islesiw perspektivası búgingi dodalawlar kún tártibiniń oraylıq temasına aylanıwı áhmiyetli, dep esaplaymız,-delinedi qutlıqlaw tekstinde. Sonday-aq, múrájatta «Oraylıq Aziya – Evropa Awqamı» sammitinde regionımız hám Evroawqam mámleketleri arasında strategiyalıq sheriklik ornatıw haqqında tariyxıy qarar qabıl etilgeni ayrıqsha atap ótildi.
Ánjuman aldında Nizamiy Gánjawiy atındaǵı xalıqaralıq oraydıń járdemshi baslıǵı Ismoil Serageldin, Serbiyanıń burınǵı Prezidenti Boris Tadich, BMSh Bas Assambleyası 73-sessiyasınıń baslıǵı, 2017-2018-jıllarda Ekvadordıń burınǵı sırtqı isler hám qorǵanıw ministri lawazımlarında islegen Mariya Fernanda Espinoza shıǵıp sóylep, Ózbekstannıń Oraylıq Aziya hám Qubla Kavkaz birge islesiwin bekkemlew jolındaǵı umtılısların joqarı bahaladı.
Bunnan tısqarı, joqarı mártebeli miymanlar Ózbekstannıń IT startaplardı qollap-quwatlaw, finanslıq texnologiyalar hám elektron húkimetti rawajlandırıw tarawlarına qánigelesken xalıqaralıq reytinglerdegi joqarı nátiyjelerin atap ótti. Usı kózqarastan, aldınǵı sanlı sheshimler hám ilimiy qollanbalardı ámelge asırıwda kooperaciyanı kúsheytiw áhmiyetli ekenligi atap ótildi. Jasalma intellektti engiziw region mámleketleri ushın tek ǵana turaqlı ósiw hám innovaciyalıq rawajlanıw emes, al global básekige shıdamlılıqtı arttırıw imkaniyatın beretuǵını kórsetip ótildi.
Ilajdıń tolıq maǵlıwmatların ÓzAda baqlap barıń.

Ótkir Alimov,
Asliddin Alijonov (foto),
ÓzA