Ózbekstan Sawda-sanaat palatası Qaraqalpaqstan Respublikası basqarmasında “Fermer xojalıqlarında kóp tarmaqlı jumıstı rawajlandırıw mashqalaları hám wazıypaları” atamasında ámeliy konferenciya bolıp ótti.

Oǵan Ózbekstan Fermerler keńesiniń basshıları, respublika fermer xojalıqlarınıń wákilleri, ÓzLiDeP Qaraqalpaqstan Respublikası Keńesiniń belsendileri qatnasıp, ilaj ashıq-aydın hám konstruktivlik pikirlesiw maydanına aylandı.
Konferenciyada ÓzLiDeP Siyasiy Keńesiniń hám Ózbekstan Fermerleri keńesiniń baslıǵı Aktam Xaitov, Qaraqalpaqstan Respublikası Ministrler Keńesi Baslıǵınıń orınbasarı Shuxrat Teshaev hám basqalar shıǵıp sóylep, mámleketimiz tárepinen awıl xojalıǵı tarawınıń wákillerine sistemalı túrde kórsetilip atırǵan járdemler, jeńilletilgen kreditler, tuqım hám nál ushın ajıratılıp atırǵan subsidiyalar, zamanagóy texnikalar hám zúráátti bazarǵa jetkeriwde ámeliy járdem beriw múmkinshiliklerine keńnen toqtap ótti.
Májiliste atap ótilgenindey, awıl xojalıǵın sanlastırıw hám kóp tarmaqlı fermer xojalıqların rawajlandırıw – bul mámlekettiń agrar potencialın tolıq júzege shıǵarıwǵa qaratılǵan tiykarǵı baǵdar bolıp esaplanadı. Mámleket tárepinen kórsetilip atırǵan qollap-quwatlaw, innovaciyalıq sheshimler hám fermerlerdiń belsendiligi sebepli búgin awıl xojalıǵı tarawı tek ǵana ekonomikalıq ósiw deregi emes, al zamanagóy, básekige shıdamlı hám eksportqa qolaylı tarmaq sıpatında qáliplesip barmaqta.
– Sońǵı jılları ovoщ hám palız ónimlerin tikkeley eksport etiw imkaniyatına iye boldıq. Jeńilletilgen kreditler sebepli zamanagóy tamshılatıp suwǵarıw sisteması satıp alındı. Ónim derlik eki esege arttı,-deydi “Qońıratbay Mehriy” fermer xojalıǵınıń baslıǵı S.Aytmuratov.
Xojelishi fermer T.Matkarimova bolsa fermerlerdi jańa texnologiyalarǵa oqıtıw boyınsha mámleketlik baǵdarlama oǵan ıssıxanada pomidor jetistiriwdi jolǵa qoyıwǵa járdem bergenin atap ótti.
– Burın pomidordı tek ashıq maydanda jetistiretuǵın edik hám máwsimge baylanıslı edik. Endi ıssıxanalarda jıl dawamında ónim alamız, tuqımın ózlerimiz jetistirip bazarǵa da shıǵaramız. Bul turaqlı dáramat, jańa jumıs orınları hám qıs aylarında da ónim jetkerip beriw imkaniyatın berdi.
Konferenciyada awıl xojalıǵında sanlı texnologiyalardı engiziw baǵdarında alıp barılıp atırǵan jumıslar da ayrıqsha atap ótildi. Atap aytqanda, agro.gov.uz platforması arqalı fermerler ushın jer ijarası, subsidiyalar, tuqımgershilik, ónimlerin bazarǵa shıǵarıw hám suw resursların basqarıw sıyaqlı baǵdarlar sanlastırılǵan. Búgingi kúnde bul sistemalar arqalı 3,2 million gektar jer qadaǵalawǵa alınǵan, 1,4 trillion sumlıq subsidiyalar tarqatılǵan hám 843 mıń diyqan sanlı ijara sistemasına tartılǵan.
Bul sanlı kózqaraslar fermerlerdiń jumısın jeńillestirip, isenimli maǵlıwmatlar tiykarında qarar qabıl etiw imkaniyatın jaratpaqta. 2025-jıldan baslap jańa áwlad innovaciyalıq platformaları – AgroMonitoring, AgroDocs, Hosil Qabul 2.0 sıyaqlı joybarlardıń engiziliwi rejelestirilgen bolıp, bul tarmaqtıń jáne de ashıq-aydın, nátiyjeli hám texnologiyalıq rawajlanǵan tarawǵa aylanıwı kútilmekte.

Qaraqalpaqstan xabar agentligi