Usı jıldıń 18-avgust kúni Ózbekstan Respublikası Oliy Majlisi Senatınıń Baslıǵı Tanzila Narboeva basshılıǵındaǵı parlament delegaciyası Qazaqstan Respublikası Parlamenti Senatınıń Baslıǵı Maulen Áshimbaevtıń mirát etiwine bola Astana qalasına rásmiy sapar menen keldi.

Sapar etiw sheńberinde Ózbekstan Respublikası Oliy Majlisi Senatı hám Qazaqstan Respublikası Parlamenti Senatı arasında 2025-2026-jıllarǵa mólsherlengen birge islesiwdi rawajlandırıw boyınsha “jol kartası”na qol qoyıw rejelestirilgen. Hújjet parlamentleraralıq sóylesiwdi bekkemlew hám eki tárepleme kún tártibindegi áhmiyetli máseleler boyınsha birge islesiwdi keńeytiwge qaratılǵan.
Sapar baǵdarlamasına muwapıq Senat Baslıǵı Tanzila Narboevanıń Qazaqstan Respublikası Parlamenti Senatınıń Baslıǵı Maulen Áshimbaev, Qazaqstan Respublikası Parlamenti Májilisiniń Baslıǵı Erlan Koshanov, sonday-aq, Qazaqstan Respublikası Prezidenti janındaǵı Hayal-qızlar hám shańaraqlıq-demografiyalıq siyasat isleri boyınsha milliy komissiya aǵzaları menen ushırasıwları názerde tutılǵan.
Bunnan tısqarı, delegaciya aǵzaları Ózbekstan hám Qazaqstan ilimiy-dóretiwshi zıyalılarınıń birinshi forumında da qatnasadı, sonday-aq, “Astana” xalıqaralıq finans orayınıń jumısı menen tanısadı.

Qaraqalpaqstan xabar agentligi