Stambul qalasındaǵı belgili “Tiyatro Kayfi” teatrınıń direktorı hám rejissyorı Kemal Bashar Berdaq atındaǵı Qaraqalpaq mámleketlik akademiyalıq muzıkalı teatrına kelip, ol teatr direktorı P.Mamutov hám dóretiwshilik jámáát tárepinen jaqsı kútip alındı,-dep xabar bermekte Mádeniyat ministrliginiń málimleme xızmeti.
Miyman dáslep teatr saxnası, dóretiwshilik ustaxanaları hám saxna artı turmısı menen jaqınnan tanıstı. Qaraqalpaqstan Respublikası Mádeniyat ministriniń orınbasarı I.Xojanazarovtıń qatnasıwında aktyorlar menen qızǵın sáwbetlesiwler ótkerilip, kórkem ónerge bolǵan qatnas hám dóretiwshilik tájiriybeler menen ortaqlastı. Sáwbetlesiw dawamında eki teatr arasında keleshekte ámelge asırılıwı rejelestirilgen birge islesiw joybarları haqqında keńnen pikir alıstı. Bul ushırasıw eki xalıqtıń mádeniyatın jaqınlastırıwshı, dóretiwshilik birge islesiwdiń jańa shıńların ashıwshı áhmiyetli qádemlerden esaplanadı.
Maǵlıwmat ushın, usı teatr jámááti Túrkiyanıń Stambul qalasında ótkerilgen “7-Etnosport” mádeniyat festivalında qatnasıp, Berdaq atındaǵı Qaraqalpaq mámleketlik akademiyalıq muzıkalı teatrınıń direktorı P.Mamutov hám Stambul qalasındaǵı “Tiyatro Kayfi” teatrınıń direktorı Kemal Bashar arasında dúzilgen Memorandumǵa muwapıq, avgust ayında túrkiyalı dóretiwshiler Qaraqalpaqstanǵa dóretiwshilik sapar menen keliwi, jańa spektakl saxnalastırılıwı kelisip alınǵan edi.
Búgingi kúnde birgeliktegi spektakldi saxnalastırıw boyınsha tayarlıq jumısları baslandı.

Á.Jiyemuratov,
Qaraqalpaqstan xabar agentligi