Gaz támiynatı tarawı xızmetkerleri búgingidey ashıq-jaqtı kúnlerde dıqqat itibardı gaz tarmaqların gúzgi-qısqı máwsimge tayarlaw jumıslarına qaratpaqta.

Gúzgi-qısqı máwsimde tutınıwshılarǵa bir tegis tábiyǵıy hám suyılttırılǵan gaz jetkerip beriwde dus keletuǵın mashqalalardıń aldın alıwda gaz tarmaqların texnikalıq tekseriwden ótkeriw áhmiyetli sanaladı.
Házirgi waqıtta taraw qánigeleri orınlarda gaz tarmaqlarına iri ońlaw, qurılıs, rekonstrukciyalaw jumısları menen birge, mashqalalı aymaqlardaǵı gaz támiynatı menen baylanıslı múrájatlardı úyrenip, olardı saplastırıw jumıslarına itibar qaratpaqta.
– «Hududgaz Qaraqalpaqstan» gaz támiynatı filialı tárepinen 2025-2026-jılǵı gúzgi-qısqı máwsimde gaz támiynatınıń turaqlılıǵın támiyinlewde mánzilli baǵdarlama tiykarında belgilep alınǵan ilajlar boyınsha orınlarda keń kólemli qurılıs, rekonstrukciyalaw, iri ońlaw jumısların alıp barmaqta,-deydi Nókis rayonlıq gaz támiynatı bóliminiń bas injeneri Í.Baxiev.
Nókis rayonındaǵı Darsan mákan puqaralar jıyını aymaǵındaǵı «Jiydeli» awılı, Aq terek mákan puqaralar jıyını, Qırantaw hám Baqanshaqlı awıl puqaralar jıyını aymaqlarındaǵı tutınıwshılardı hám sociallıq obektlerdi tábiyǵıy gaz benen támiyinlewshi D-219 mm.lik orta basımlı gaz tarmaǵınıń 1,7 kilometrlik bólegin jer ústine shıǵarıw hám rekonstrukciyalaw jumısları alıp barılmaqta.
Maǵlıumat ushın, Nókis rayonında 10167 jeke tutınıwshı hám 127 kótere tutınıwshılar tábiyǵıy gaz benen támiyinlengen. Olarǵa tábiyǵıy gaz jetkerip beriwde rayon boyınsha jámi 477,5 kilometrlik uzınlıqtaǵı gaz tarmaqları islep turıptı. Solardıń 12,1 kilometrlik bólegi joqarı, 156,8 kilometrlik bólegi orta, 308,6 kilometrlik bólegi tómen basımlı gaz tarmaqları bolıp esaplanadı.

Á.Jiyemuratov,
Qaraqalpaqstan xabar agentligi.