Shegarashı ózine júklengen jawıngerlik xızmet wazıypaların orınlap atırıp, bir sekund ta sergeklikti umıtpaydı. Sebebi, bul juwapkershiliktiń artında ata-anaları, dos-yaranları bar ekenligin, watan keńliklerindegi tınısh turmıs shegaradan baslanatuǵının jaqsı biledi. Elimizdiń túrli aymaqlarında ózine bekitilgen xızmet wazıypasın maqtanısh penen alıp barar eken, olar biyǵárez elimizdiń hár bir qarıs jerin kózdiń qarashıǵınday qásterlep saqlaydı.

Watan bosaǵadan baslanadı, deydi xalqımız. Al, mámleket shegarasındaǵı arnawlı qadaǵalaw ótkeriw punktleri – mámleketimizdiń dárwazası bolıp esaplanadı.
Shegara qadaǵalawı arqalı áskeriy xızmetkerler pidayılıǵı, mártligi, sergekligi menen mámleketlik shegaralardan náshebentlik zatlar, tovar-materiallıq baylıqlardıń nızamsız túrde alıp ótiliwiniń aldın alıp, erkinligimizge kóleńke salatuǵın sırtqı kúshlerden qorǵap kelmekte.
Húrmetli Prezidentimizdiń baslaması menen áskeriy xızmetkerler hám olardıń shańaraq aǵzaların sociallıq qorǵaw baǵdarında keń kólemli jumıslardıń alıp barılıp atırǵanı da ayrıqsha maqtawǵa ılayıq.
Mine, usınday iygilikli islerdiń biri shegarashılarımızǵa xızmet turaq jaylarınıń tapsırılıwı boldı.
Ózbekstan Respublikası ǵárezsizliginiń 34 jıllıq bayramı múnásibeti menen Qońırat rayonındaǵı “Qaraqalpaqstan” elatlı punktinde jaylasqan áskeriy bólimlerdiń birinde xızmet wazıypasın márdana atqarıp atırǵan áskeriy xızmetkerler hám olardıń shańaraq aǵzaları ushın mólsherlengen xızmet turaq jaylarınıń giltlerin óz iyelerine saltanatlı tapsırıw máresimi bolıp ótti.
Bayram ilajına Qaraqalpaqstan Respublikası Joqarǵı Keńesi, rayon belsendileri hám Mámleketlik qáwipsizlik xızmeti Shegara áskerleri sárkardalıǵınıń juwapker oficerleri qatnastı.
Ilajda shıǵıp sóylegenler, sońǵı jılları el qorǵawshıları ushın múnásip xızmet hám turmıs sharayatların jaratıwǵa úlken itibar qaratılıp atırǵanın, bul qurıp paydalanıwǵa tapsırılıp atırǵan ıqsham turaq jaylar da áne, usı joqarı itibardıń úlgisi ekenin ayrıqsha atap ótti.
Bayram qutlıqlawınan soń intizarlıq penen kútilgen waqıtlarǵa gezek kelip, jaylardıń giltleri óz iyelerine tapsırıldı.
Áskeriy bayram kiyimlerinde sap tartqan, júzinde quwanısh sáwlelengen áskeriy xızmetkerler hám olardıń shańaraq aǵzaları ushın zamanagóy joybarlarǵa tiykarlanıp qurılǵan bul 48 kvartiralı sawlatlı imarat ıqsham hám barlıq zamanagóy qolaylıqlarǵa iye. Sonday-aq, ilajda áskeriy xızmetkerlerdiń shańaraq aǵzalarınıń bántligin támiyinlew maqsetinde tolıq úskenelengen tigiwshilik cexı da paydalanıwǵa tapsırıldı.
Álbette, bunday qolaylıqlardıń jaratılıwı, shegaralarımızdı qorǵawshılardıń óz shańaraǵınan qáterjam bolıp, ózine júklengen jawıngerlik-xızmet wazıypaların jáne de juwapkershilik penen orınlawında úlken áhmiyetke iye.

Á.Jiyemuratov,
Qaraqalpaqstan xabar agentligi.