Ózbekstan Respublikası Ministrler Kabineti “Mámleketlik satıp alıwlarda málimleme-kommunikaciya texnologiyalarınan paydalanıwdı keńeytiw hám mámleketlik satıp alıwlar elektron sisteması operatorlarınıń jumısın bunnan bılay da jetilistiriw boyınsha qosımsha ilajlar haqqında” qarar qabıl etti.

Oǵan muwapıq, Mámleketlik satıp alıwlar elektron sisteması operatorları haqqındaǵı reje tastıyıqlandı.
Rejede:
mámleketlik satıp alıwlar elektron sistemasın shólkemlestiriw tártibi;
mámleketlik satıp alıwlar subektlerin mámleketlik satıp alıwlardıń elektron sistemasında dizimnen ótkeriw qaǵıydaları;
mámleketlik satıp alıwlar elektron sisteması operatorları tárepinen nızamshılıq talaplarına ámel etiliwin támiyinlew hám dáslepki qadaǵalawdan ótkeriw tártibi belgilep berilgen.
2025-jıl 15-avgusttan baslap:
eń jaqsı usınıslardı tańlaw hám tender nátiyjeleri boyınsha shártnamalar mámleketlik satıp alıwlardıń elektron sistemasında avtomat túrde qáliplesedi, fizikalıq tárepler menen dúziletuǵın puqaralıq-huqıqıy xarakterdegi shártnamalar buǵan kirmeydi;
mámleketlik satıp alıwlarda elektron sanlı qoltańbalardan paydalanǵan halda tikkeley shártnamalar elektron formada dúziledi, sırt el jetkerip beriwshileri menen dúziletuǵın shártnamalar buǵan kirmeydi;
arnawlı málimleme portalında mámleketlik satıp alıwlarǵa baylanıslı pikirler, usınıslar hám shaǵımlardı qaldırıw ushın qayta baylanıs tártibi engiziledi;
jámiyetshiliktiń dodalawına jaylastırılǵan protokollar hám dúziletuǵın shártnamalar boyınsha kelip túsken narazılıqlar boyınsha mámleketlik buyırtpashılar tárepinen olardı kórip shıǵıw nátiyjeleri haqqındaǵı maǵlıwmatlar (tiyisli qararı) mámleketlik satıp alıwlar tarawında qadaǵalawshı uyımlar ushın ashılǵan jeke kabinetlerde sáwlelendiriledi.
Qararǵa bola:
mámleketlik satıp alıwlardı ámelge asırıwda satıp alıw hújjetlerin hám texnikalıq tapsırmalardı, shártnamalar, import kontraktları hám olarǵa qosımsha kelisimler joybarların kompleksli ekspertizadan ótkermew maqsetinde mámleketlik satıp alıwlardıń kólemin bóleklerge bólip jiberiwge jol qoyılmaydı;
mámleketlik satıp alıwlarǵa baylanıslı satıp alıw hújjetlerinde qatnasıwshılardıń usınısların bahalaw normaların qollanıw tártibi májbúriy kórsetiledi;
mámleketlik buyırtpashılar tárepinen jámiyetlik dodalawda kelip túsken hár bir usınıs hám narazılıqlardıń olar boyınsha anıq hám tiykarlanǵan túsiniklerin kórsetken halda kórip shıǵılıwı támiyinlenedi;
byudjet sisteması byudjetleri esabınan mobil telefonlar hám alkogol ónimleri Ministrler Kabineti menen kelisilgen halda satıp alınadı;
operatorlar tárepinen ámelde belgilengen satıp alıw tártip-qaǵıydaların ámelge asırıw menen baylanıslı xızmetler ushın komissiya jıyımı kelisimniń haqıyqıy summasınan 0,15 procentten aspaǵan halda, biraq bul jıyımlardıń sheklengen muǵdarları mámleketlik buyırtpashılar ushın bazalıq esaplaw muǵdarınıń 3 procentinen kóp bolmaǵan hám satıp alıw tártip-qaǵıydaları qatnasıwshıları ushın bazalıq esaplaw muǵdarınıń 14 esesinen kóp bolmaǵan muǵdarlarda óndiriledi;
eger donor mámleketlerdiń, xalıqaralıq shólkemlerdiń, sırt el húkimetlik hám húkimetlik emes shólkemleriniń tártip-qaǵıydalarında yamasa Ózbekstan Respublikasına beriletuǵın sırt el kreditleri hám grantların, texnikalıq járdemdi hám basqa da sırtqı biyǵárez járdemdi usınıw shártlerinde tovarlardı (jumıslardı, xızmetlerdi) satıp alıwdıń basqasha tártibi belgilengende, operatorlar tárepinen óz sistemalarında usı tártip boyınsha satıp alıwlardı ámelge asırıw imkaniyatı jaratıladı.

ÓzA