Múnásibet

Usı jıldıń 8-avgust sánesinde Húrmetli Prezidentimizdiń basshılıǵında videoselektor túrinde ótkerilgen májilis joqarı oqıw orınlarınıń basshıları hám gúllán jaslarımızdıń keleshegi ushın oǵada áhmiyetli baslamalarǵa bay boldı.
Sebebi, májiliste búgingi kúndegi eń áhmiyetli máselelerdiń biri – jaslar máselesi, sonıń ishinde, joqarı oqıw orınları pitkeriwshileriniń bántligin támiyinlew máseleleri qarap shıǵıldı.

Haqıyqatında da, joqarı bilimlendiriwdiń tiykarǵı maqseti – xalqımızdıń, Jańa Ózbekstan hám Qaraqalpaqstannıń keleshek maman kadrların tayarlaw, olarǵa tek teoriyalıq hám ámeliy bilimler berip qoymastan, al olardıń jámiyetten óz ornın tabıwına, ózi tańlaǵan qánigelik baǵdarında bántligin támiyinlewden ibarat.
Usı jerde Ózbekstan Respublikası Prezidentiniń 2025-jıl 14-fevraldaǵı “Joqarı bilimlendiriw shólkemleri pitkeriwshileriniń jumısqa jaylasıwına járdemlesiw boyınsha qosımsha ilajlar haqqında”ǵı PQ-61-sanlı qararın atap ótiw orınlı. Bul qarar tiykarında jaslardıń bántligin támiyinlew, joqarı bilimlendiriw shólkemleri pitkeriwshileriniń miynet bazarına integraciyasın kúsheytiw maqsetinde elimizde “Keleshekke qádem” baǵdarlaması ámeliyatqa engizildi.
“Keleshekke qádem” baǵdarlamasınıń ámeliyatqa engiziliwi joqarı bilimlendiriw orınları pitkeriwshileriniń bántligin támiyinlewde olardıń biznes kónlikpelerin qáliplestiriw, óz tarawındaǵı biznes joybarların turmısqa engiziwine járdemlesiwge xızmet etpekte.
Prezidentimizdiń basshılıǵında ótkerilgen videoselektor májilisi usı baǵdardaǵı nátiyjeli baslamalardıń dawamı boldı. Onda Jurtbasshımız tárepinen bul baǵdardaǵı, yaǵnıy kadrlar tayarlaw sisteması real talaptı qanaatlandırmay atırǵanı atap ótilip, bul boyınsha úlgili joqarı oqıw orınları hám olar erisip atırǵan unamlı nátiyjeler tilge alındı.
Sonday-aq, joqarı bilimlendiriwdi tarawlardıń talabı dárejesinde kóteriw, kadrlar tayarlawdıń sapası hám jaslardıń bántlik kórsetkishin jedel arttırıw boyınsha jańa baslamalardı algan qoydı.
Atap aytqanda, bunnan bılay investor yaki jumıs beriwshiler menen joqarı oqıw orınları juwapkerleri arasında maqsetli birge islesiw ámeliyatı jolǵa qoyılmaqta. Bul – keleshekte joqarı oqıw orınları jumıs beriwshilerdiń talabına bola qánigelerdi tayarlap beredi, tiykarǵısı olardıń bántligi kepillikke alınadı, degeni.
Videoselektor májilisinde Prezidentimiz joqarı oqıw orınlarınıń wákillik sheńberin keńeytiwge de toqtap ótti. Itibar beriń, bunnan bılay barlıq joqarı oqıw orınları shólkemlestiriw hám akademiyalıq jaqtan erkin boladı. Sonıń ishinde, endi joqarı oqıw orınları basshıları orınbasarların ózi tayınlaydı, belgilengen muǵdar sheńberinde professor-oqıtıwshılar hám basqarıw xızmetkerlerin ózi bólistiredi jáne rektorlarǵa «super kontrakt» muǵdarın katigoriyalasqan halda belgilew wákilligi de berilmekte.
Prezidentimiz tárepinen jáne bir áhmiyetli baslama. Bárimizge belgili bolǵanınday, sońǵı jıllarda jaslardı joqarı oqıw orınlarına qamtıp alıwda keń imkaniyatlar jaratıldı. Solardıń biri – abiturientlerdiń bir waqıtta 5 ke shekemgi joqarı oqıw ornına tapsırıw imkaniyatınıń beriliwi. Májiliste bul imkaniyattıń jáne keńeytiletuǵını atap ótildi. Yaǵnıy, bunnan bılay abiturientler ózi tańlaǵan bes joqarı oqıw ornınan birde-birewine kire almasa, biraq toplaǵan balı basqa joqarı oqıw ornındaǵı tolmaǵan baǵdarǵa tuwrı kelse, olar sol joqarı oqıw ornına shártnama tiykarında qabıl etiliwi múmkin bolmaqta.
Bul da joqarı maǵlıwmatlı bolaman, ózi tańlaǵan qánigelikkke iye bolıp, xalqımızdıń rawajlanıwına óz úlesimdi qosaman, degen jaslarǵa jaratılǵan imkaniyatlardıń dawamı boldı.
Juwmaqlap aytqanda, Prezidentimizdiń basshılıǵında ótkerilgen videoselektor májilisi joqarı oqıw orınlarınıń abırayın arttırıw hám wákillik sheńberin keńeytiw, eń áhmiyetlisi, jumıs beriwshiler menen tıǵız baylanıs ornatıw arqalı jaslarımızdıń kepillikke alınǵan joqarı bántlik kórsetkishlerine erisiwde oǵada áhmiyetli boldı.
Bunda álbette, joqarı oqıw orınları basshılarına da úlken juwapkershilik júklenedi. Bul baǵdarda Húrmetli Prezidentimizdiń bizge bildirip atırǵan isenimi hám berip atırǵan wákilliklerinen nátiyjeli paydalanıwımız tiyis.

Amanjol AYaPOV,
Qaraqalpaqstan Respublikası Joqarı bilimlendiriw,
ilim hám innovaciyalar ministri.
Qaraqalpaqstan xabar agentligi