«Jaqsınıń jaqsılıǵın ayt iymanı tassın» degenindey, sport tarawınıń pidayısı erkin gúres boyınsha burınǵı awqam sport sheberi Baxıy Jumamuratov tuwralı sóz qozǵasaq, kópshilik zamanlaslarımız onıń joqarı adamgershilik pazıyletlerin húrmet penen tilge aladı.

Taxtakópirli aǵash ustası Jumamurat aǵanıń shańaraǵında dúnyaǵa kelgen onıń balalıq dáwiri Nókis qalasında ótti. Paytaxtımızdaǵı 4-sanlı ulıwma orta bilim beriw mektebinde oqıp bilim alǵan ol kishkeneliginen sportqa qızıǵıp ósti. Ásirese, respublikamızǵa belgili palwan Jaqsımurat Mambetovtıń kóplegen balalar sıyaqlı, Baxıydı da sport mektebinde shólkemlestirilgen erkin gúres dógeregine shaqırıwı, onıń bul sport túrine degen qushtarlıǵın arttırdı hám sporttı pútkil ómiriniń mazmunına aylandırdı, desek aljaspaǵan bolamız.
Mektepte oqıp júrgen gezleri dáslep respublikalıq, sońınan pútkil awqamlıq spartakiadalarǵa qatnasıp, shınıqqan ol Ózbekstan, keyin ala burınǵı awqam chempionatlarında óz sheberligin kórsetip, bir qatar jarıslarda jeńimpazlıqtı qolǵa kirgizdi.
Orta mektepti tamamlaǵannan soń Qaraqalpaq mámleketlik pedagogikalıq institutınıń denetárbiyası fakultetine oqıwǵa kirip, óziniń ámeliy bilimlerin teoriyalıq jaqtan bekkemlep, bul dárgaydı 1976-jılı tabıslı pitkerip shıǵıwǵa eristi.
Sońınan óziniń tańlaǵan kásibi boyınsha Nókis qalasındaǵı 3-sanlı qánigelestirilgen jas óspirimler sport mektebinde trener bolıp jumısqa aralastı hám jas óspirimlerge erkin gúrestiń álwan túrli sırların úyretti. «Ustazlıq etken jalıqpas» degenindey, onıń balalar menen erinbesten birge shuǵıllanıwı, olarǵa durıs jol-joba kórsetiwi óziniń unamlı nátiyjesin kórsetip, kóplegen shákirtleri Ózbekstan kólemindegi jarıslarda jeńimpazlıqtı qolǵa kirgizdi.
Atap aytqanda, Sharap hám Keńesbay Sariev, Abay Eщanov, Ermek hám Mars Baxievlar Ózbekstan hám burınǵı awqam kólemindegi jarıslarda jeńip shıǵıp, respublikamızdıń abırayın kóklerge kóterdi.
-Baxıy aǵanı 6-klasımnan baslap tanıyman,-deydi belgili palwan hám tájiriybeli trener Sharap Sariev.-Sol jılları ol mektebimizde erkin gúres sekciyasın ashıp, oqıwshılardı shuǵıllandıra basladı. Onıń trenerlik sheberliginiń arqasında, tez arada erkin gúres penen shuǵıllanıwshılar sanı artıp, olar zalǵa sıymay turatuǵın edi. Sebebi, ustazımız óziniń jıllı sózi hám ádep-ikramı menen kópshiliktiń názerine túsken talapshań insan boldı. Meniń joqarı oqıw ornına kirip, usınday belgili trener bolıp jetilisiwim de onıń salmaqlı miyneti bar. Bizler ustazımızdıń bul aǵla pazıyletlerin hesh qashan umıtpaymız.
Baxıy aǵa shákirtlerine mehriban hám talapshań ustaz bolıw menen birge, óz wazıypasına oǵada juwapkershilikli xızmetker boldı. Onıń bul pazıyletleri tez arada kózge túsip, ol dáslep sport mektebi direktorınıń orınbasarı, sońın ala direktor bolıp jumısqa tayınlanadı.
-Baxıy aǵa menen 1998-jıldan baslap birge islestik,-deydi onıń shákirtleriniń biri Serik Júsipbekov.-Ol sport mektebinde direktor waqtında barlıq xızmetkerlerge teńdey qatnas jasaytuǵın oǵada ádil hám kishipeyil basshı boldı. Meni respublikalıq sport mektebinen jumısqa shaqırıp, ózi basqarǵan mektepke trener etip jumısqa aldı hám hár tárepleme qollap quwatladı. Ustazımızdıń aqıl-násiyatın tıńlap bizlerde kem bolmadıq. Átteń, sum ájel onı aramızdan erte alıp ketti…
Haqıyqatında da, Baxıy Jumamuratov kúshli palwan, sheber shólkemlestiriwshi basshı bolıw menen birge, haq kewil, saldamanlı hám kishipeyil insan edi.
Sonlıqtan bolsa kerek, respublikamız basshıları onıń iskerligi hám pidayılıǵın esapqa alıp, Qaraqalpaqstan Respublikası Denetárbiyası hám sport boyınsha mámleketlik komitetine baslıq etip tayınladı. Bul juwapkershilikli lawazımda islegen jılları respublikamız sportshıları Ózbekstan hám xalıqaralıq kólemdegi jarıslarda úlken jetiskenliklerdi qolǵa kirgizip, elimiz bayraǵın bálentlerde jelbiretti.
-Shańaraqta 2 ul hám 2 qız birge tárbiyalandıq,-deydi Baxıy aǵanıń úlken balası Alım.-Úyde oǵada qatal hám talapshań áke boldı. Bizlerdiń sport penen shuǵıllanıp, elimizge kerekli, bilimli azamatlar bolıp jetilisiwimizdi qáleytuǵın edi. Sonlıqtan jumıs penen birge, shańaraqtaǵı balalar tárbiyasına da ayrıqsha itibar qarattı. Bunıń nátiyjesinde bizlerdiń barlıǵımız da joqarı oqıw orınların tamamlap, búgingi kúni xalıq xojalıǵınıń hár qıylı tarawlarında jemisli xızmet islep atırmız.
Bizler búgin Baxıy aǵanı biykardan-biykarǵa sóz etpedik. Sebebi, búgin bul insan tiri bolǵanında óziniń 70 jasın belgilegen bolar edi. Tilekke qarsı, sum ájel onı aramızdan erterek alıp ketti. Degen menen, ustazdıń ózi bolmaǵanı menen onıń shańaraq aǵzaları, dosları, shákirtleri hám birge islesken kásiplesleri bul insandı húrmet penen eske almaqta.
«Jaqsıdan sharapat» degen usı bolsa kerek.

Adilbay Orazov,
Qaraqalpaqstan xabar agentligi sholıwshısı