Ellikqala rayonındaǵı “Iqbol” máhállesi xalqınıń tábiyǵıy gaz benen tolıq támiyinleniwi boyınsha mashqalaǵa shek qoyıw maqsetinde keń kólemli jumıslar baslandı. Qaraqalpaqstan Respublikası prokurorınıń úyreniwleri nátiyjesinde máhálle xalqınıń bul baǵdardaǵı múrájatların unamlı sheshiw máseleleri kórip shıǵıldı.

Rayonnıń “Nawayı,” “Iqbol” hám “Ellikqala” awıl puqaralar jıyınların tábiyǵıy gaz benen támiyinlewshi eskirgen hám 30 jıldan aslam paydalanılǵan 2,1 km uzınlıqtaǵı jer astı gaz qubırları pútkilley jańalanbaqta. Bul jumıslar juwmaqlanǵannan soń 1 955 shańaraqqa gaz jetkerip beriw sapalı dárejede jaqsılanadı hám jıllıq 180 mıń kub metrden aslam gaz shıǵınınıń aldı alınadı, – dep maǵlıwmat beredi rayon hákimliginiń Málimleme xızmeti bólimi.
Xalıq ushın zárúr qolaylıqlardı jaratıw maqsetinde ámelge asırılıp atırǵan bul joybar xalıqtıń turmıs dárejesin arttırıwda úlken áhmiyetke iye. Bunnan tısqarı, tábiyǵıy gaz támiynatınıń turaqlı hám nátiyjeli bolıwına xızmet etedi.
Bar mashqalalardı saplastırıw hám xalıqtıń múrájatlarına jedel sheshim tabıw jámiyettiń perspektivalı rawajlanıwında tiykarǵı áhmiyetke iye ekenligi jáne bir márte dálillenbekte.

Qaraqalpaqstan xabar agentligi