Házirgi waqıtta Oraylıq Aziya xalıqaralıq institutında (OAXI) “Oraylıq Aziya xalıqlarınıń mádeniy integraciyasın bekkemlewde Abay ruwxıy miyrasınıń ornı” atamasında xalıqaralıq ilimiy-ámeliy konferenciya bolıp ótpekte.

Qazaqstannıń elimizdegi elshixanasınıń járdeminde shólkemlestirilgen bul ilaj regionnıń mádeniy-gumanitarlıq kún tártibinde ayrıqsha orın iyeleydi.
Ánjumanda mámleketlik uyımlar, diplomatiyalıq korpus, ilimiy hám dóretiwshilik topar wákilleri, sonday-aq, studentler, akademiyalıq jámiyetshilik jetekshileri qatnaspaqta.
Qatnasıwshılar arasında Oraylıq Aziya mámleketleri hám xalıqaralıq shólkemlerdiń izertlewshileri, jazıwshılar, awdarmashılar, mádeniyat hám kórkem óner ǵayratkerleri, sonday-aq, Ózbekstandaǵı qazaq, qırǵız, tájik, túrkmen, ázerbayjan, belarus, rus, tatar hám bashqurt mádeniyat oraylarınıń belsendileri bar.
Konferenciyada ullı qazaq shayırı, oyshılı hám reformatorı Abay Qunanbay ulınıń 180 jıllıǵı múnásibeti menen onıń kóp qırlı miyrası haqqında pikir alısılmaqta.
OAXI direktorı Javlon Vahobov ullı jazıwshınıń insan, jámiyet, aǵartıwshılıq hám ádep-ikramlılıq qádiriyatları menen baylanıslı kózqarasları XXI ásirde de áhmiyetliligin joǵaltpay, mámleketleraralıq qarım-qatnas hám mádeniy birge islesiw dawam etip atırǵanın atap ótti.
Qazaqstannıń mámleketimizdegi Ayrıqsha hám tolıq huqıqlı elshisi Beybut Atamqulov shayırdıń ádebiyat, kórkem óner hám mádeniyattıń rawajlanıwına qosqan úlesi haqqında aytıp, Prezident Qasım-Jomart Toqaevtıń baslaması menen tuwısqan elde Abay esteligin máńgilestiriw maqsetinde ámelge asırılıp atırǵan jumıslarǵa toqtap ótti.
Atap ótiliwinshe, Abaydıń qosıq shıǵarmaları hám “Násiyat sózleri”nde sáwlelendirilgen adamgershilik principi túrli xalıqlar bir-birin jaqsıraq túsiniwine, ruwxıy mádeniyattı bayıtıwǵa járdem beredi. Bul táliymat global shaqırıqlar hám óz-ara baylanıslılıq shárti zárúrligi kúsheyip baratırǵan sharayatta jáne de áhmiyetli bolıp esaplanadı.
– Abay xalıqtı jawızlıqtan qutqarıwǵa umtılǵan. Onıń shıǵarmaları tek ǵana qazaq oqıwshıları emes, al pútkil Oraylıq Aziyanıń ulıwma baylıǵı sıpatında, ózbek kitapqumarları ushın da qádirli, – deydi mádeniyat ministriniń orınbasarı Murod Majidov. – Sonıń ushın elimizde de bul oyshıldıń ómiri hám dóretiwshiligin tereńirek úyreniw maqsetinde túrli mádeniy ilajlar ótkerilmekte.
Ánjumanda jaslar, ilimiy topar wákilleri, keń jámiyetshilik arasında Abay ideyaların úgit-násiyatlawǵa qaratılǵan ilimiy hám mádeniy talqılawlar almasılıp, ámeliy baslamalar islep shıǵılmaqta. Ulıwma, ilaj mádeniy-gumanitarlıq baylanıslardı bekkemlew, mádeniyatlararalıq qarım-qatnastıń kólemin keńeytiwge xızmet etedi.

Behruz Xudoyberdiev,
ÓzAnıń xabarshısı