Ózbekstan Respublikası Joqarı bilimlendiriw, ilim hám innovaciyalar ministri Q.Sharipov Qaraqalpaqstan Respublikasına xızmet saparı sheńberinde Berdaq atındaǵı Qaraqalpaq mámleketlik universitetinde joqarı hám kásiplik bilimlendiriw mákemeleriniń basshıları menen ushırastı.

Ushırasıwǵa Qaraqalpaqstan Respublikası Joqarǵı Keńesiniń komitet baslıǵı M.Atamuratov, Ministrler Keńesi Baslıǵınıń orınbasarı B.Otemuratov, ministrlikler hám shólkemlerdiń basshıları, sonday-aq, juwapker wákilleri qatnastı.
Kún tártibine muwapıq, dáslep shólkemlestiriw máselesi kórip shıǵılıp, Qaraqalpaqstan Respublikası Joqarı bilimlendiriw, ilim hám innovaciyalar ministri lawazımına Amanjol Ayapovtıń tayınlanǵanlıǵı málim etildi.
Atap ótiw kerek, A.Ayapov tayınlawǵa shekem Ózbekstan mámleketlik kórkem óner hám mádeniyat institutı Nókis filialınıń direktorı sıpatında jumıs islegen.
Bunnan soń ilajda joqarı oqıw orınlarınıń pitkeriwshi studentleri, sonıń menen birge, kásiplik bilimlendiriw mákemeleriniń pitkeriwshi oqıwshılarınıń bántligin támiyinlew baǵdarında ámelge asırılıp atırǵan jumıslar kórip shıǵıldı. Bul baǵdarda orın alıp atırǵan kemshilikler atap ótilip, mashqalalardı saplastırıw boyınsha juwapkerlerge tiyisli tapsırmalar berildi.
Ministr Q.Sharipov Prezidentimizdiń basshılıǵında joqarı oqıw orınları pitkeriwshileriniń bántligin támiyinlew boyınsha ótkerilgen keńeytilgen májiliste belgilep berilgen wazıypalardıń orınlanıwın támiyinlewde jumıs beriwshiler, óndirislik kárxanalar menen birge islesiwdiń áhmiyetin atap ótti. Bul baǵdardaǵı jumıslardı bunnan bılay da jetilistiriw hám muwapıqlastırıw maqsetinde pitkeriwshilerdiń bántligin támiyinlew shtabı shólkemlestiriletuǵınlıǵın málim etti.
Ushırasıwda jumıs beriwshi tiyisli ministrlikler hám kárxanalar, sonday-aq, joqarı hám kásiplik bilimlendiriw mákemeleri tárepinen birgelikte ámelge asırılatuǵın jumıslar, sonıń menen birge, jańa oqıw jılına puqta tayarlıqlar kóriw wazıypaları belgilep alındı.

Qaraqalpaqstan xabar agentligi