Ózbekstan elshisi Dilshod Axatov Germaniyanıń Tyuringiya federal úlkesi Bas ministri Mario Foigt, parlament baslıǵı Tadeus Kyonig hám Ekonomika hám awıl xojalıǵı ministrliginiń mámleketlik xatkeri Mario Zukert penen ushırasıwlar ótkerdi.

Bul haqqında “Dunyo” MA dep xabar beredi.
«Jergilikli parlamenttiń baslıǵı Tadeus Kyonig penen sáwbetlesiw dawamında bolsa nemis tárepi nızamshılıq, turizm hám mádeniyat baǵdarlarındaǵı birge islesiwdi rawajlandırıw hám óz-ara tájiriybe almasıwdan mápdar ekenin bildirdi. Atap aytqanda, respublikamızdıń turizm tarawındaǵı potencialı hám imkaniyatlarına joqarı baha berildi.
Tyuringiya federal úlkesiniń Bas ministri Mario Foigt penen bolıp ótken sóylesiw waqtında Bas ministr Ózbekstanda ámelge asırılıp atırǵan keń kólemli reformalardı unamlı bahalap, mámlekette barlıq tarawlarda úlken dinamika baqlanıp atırǵanın ayrıqsha atap ótti.
Ushırasıw juwmaǵında Ózbekstan hám Tyuringiya qatnasıqların jáne de rawajlandırıw, avtomobil qurılısı, toqımashılıq, IT hám joqarı texnologiyalar, awıl xojalıǵı, dual bilimlendiriw hám basqa da tarawlarda sheriklikti jedellestiriw boyınsha anıq ilajlardı ámelge asırıwǵa kelisip alındı.

Ekonomika hám awıl xojalıǵı ministrliginiń mámleketlik xatkeri Mario Zukert penen bolıp ótken sóylesiw waqtında Ózbekstanǵa Tyuringiyalı isbilermenler delegaciyasınıń saparın shólkemlestiriw, respublikamız hám Tyuringiya federal úlkesinde ótkeriletuǵın xalıqaralıq kórgizbelerde eki tárep biznes wákilleriniń qatnasıwın islep shıǵıw jáne ekonomikalıq birge islesiwdi sistemalı jolǵa qoyıw boyınsha mexanizmlerin qáliplestiriw máseleleri dodalandı», delinedi xabarda.

Qaraqalpaqstan xabar agentligi