Kosmoslıq texnologiyalardı rawajlandırıw mámleketlik basqarıw hám ekonomika tarmaqlarında nátiyjelilikti arttırıwda úlken áhmietke iye.

Bul texnologiyalar mámleketlik baǵdarlamalardı ámelge asırıwda maǵlıwmatlardı tolıq hám anıq usınıw, qarar qabıl etiw processlerin optimallastırıw hám resurslardı nátiyjeli bólistiriw imkaniyatın beredi.
Ekonomika hám qarjı ministrliginde Sanlı texnologiyalar ministrligi janındaǵı Kosmoslıq izertlewler hám texnologiyalar agentligi (“Ózbekkosmos”) wákilleri menen bolıp ótken ushırasıwda bul haqqında sóz boldı.
Onda ekonomika hám qarjı ministriniń orınbasarı Otabek Fozilkarimov, “Ózbekkosmos” agentliginiń direktorı Shuhrat Qodirov hám eki táreptiń tiyisli juwapker xızmetkerleri qatnastı.
Ushırasıw dawamında agentliktiń jumısı hám tiykarǵı baǵdarlarına baylanıslı prezentaciya kórsetildi. Sonday-aq, awıl xojalıǵında suwdan paydalanıwdı monitoring etiw, jer qatnasıqları tarawında sanlı qadaǵalawdı kúsheytiw, jasıl aymaqlardı anıq esapqa alıw hám sanlastırıw, nızamsız qurılıslardı óz waqtında anıqlaw sıyaqlı baǵdarlarda kosmoslıq baqlaw texnologiyalarınan paydalanıw máseleleri dodalandı.
Otabek Fozilkarimovtıń atap ótkenindey, kosmoslıq texnologiyalardı mámleketlik basqarıw processlerinde qollanıw tek ǵana uyımlardıń nátiyjeliligin arttırıp qoymastan, al ekonomikalıq rejelestiriw hám resurslardan aqılǵa uǵras paydalanıwǵa xızmet etedi.
Ilajda málim etilgenindey, “Ózbekkosmos” 2019-jılı shólkemlestirilgen mámleketlik agentlik bolıp, mámleketimizde kosmos tarawındaǵı mámleketlik siyasattı qáliplestiriw hám ámelge asırıw, zamanagóy kosmoslıq texnologiyalardı engiziw, jasalma joldaslar arqalı monitoring hám málimleme xızmetlerin rawajlandırıw, sonday-aq, xalıqaralıq kosmoslıq birge islesiwdi keńeytiw menen shuǵıllanadı.
Agentlik penen birgelikte awıl xojalıǵı, geologiya, suw xojalıǵı hám ekologiya tarawlarındaǵı monitoring imkaniyatları sezilerli dárejede keńeytiledi. Máselen, awıl xojalıǵında jer maydanları hám eginlerdiń jaǵdayı sputnik baqlawları arqalı anıqlanadı. Bul bolsa nátiyjelilikti arttırıw hám suw jáne mineral resurslardan aqılǵa uǵras paydalanıwdı támiyinleydi.
Shuhrat Qodirovtıń sózlerine bola, geologiya, suw xojalıǵı hám ekologiya tarawlarındaǵı joybarlardı ámelge asırıwda kosmoslıq xızmetlerden keńnen paydalanıw, sonday-aq, kosmoslıq xızmetler bazarın rawajlandırıw ushın zárúr institucionallıq hám texnologiyalıq sharayatlardı jaratıw úlken áhmiyetke iye.
Ushırasıw juwmaǵında tárepler kosmoslıq texnologiyalardı ekonomikalıq rejelestiriw hám tarmaqlararalıq basqarıw processlerine integraciyalaw, sol arqalı mámleketlik basqarıwda nátiyjelilikti arttırıw hám innovaciyalıq sheshimlerdi engiziw boyınsha birge islesiwdi jáne de keńeytiwge tayar ekenligin bildirdi.

N.Ziyodullaeva, ÓzA