Qaraqalpaqstan Respublikası bajıxana basqarması Kontrabandaǵa qarsı gúresiw bólimi xızmetkerleri Ishki isler ministrligi, Mámleketlik qáwipsizlik xızmeti hám Milliy gvardiya Qaraqalpaqstan Respublikası boyınsha basqarmaları wákilleri menen birgelikte kúshli tásir etiwshi qurallar sawdasınıń aldın alıw maqsetinde Nókis qalasında operativ ilaj ótkerdi.

Ilaj dawamında aldınnan baqlawǵa alınǵan puqara qarıydarǵa quramında kúshli tásir etiwshi qurallar bolǵan dári-dármaqlardı satıp atırǵan waqtında qolǵa alındı. Bunnan soń, gúmanlanıwshı puqaranıń kórsetpesine tiykarlanıp operativ ilaj dawam ettirilip, basqa bir puqaranıń jasaytuǵın úyi kózden ótkerilgende, ol jerde jámi 550 dana kapsuladan ibarat kúshli tásir etetuǵın dári bar ekenligi anıqlanıp, ayǵaqlı dálil sıpatında alındı.
Sonday-aq, operativ ilaj Nókis diyqan bazarı aymaǵında da dawam ettirilip, sol átirapta háreketlenip kiyatırǵan jáne bir puqara toqtatıldı. Gúmanlanıwshı puqaraǵa tiyisli sumka kózden ótkerilgende, onıń ishinen quramında kúshli tásir etetuǵın elementler bolǵan 400 kapsula tabıldı.
Oraylıq bajıxana laboratoriyasınıń juwmaǵına tiykarlanıp, bul kapsulalardıń quramında “Sibutramin” kúshli tásir etiwshi zatınıń bar ekenligi málim boldı.
Operativ ilaj dawamında 950 dana kúshli tásir etetuǵın dári quralınıń nızamsız aylanısınıń aldı alındı. Anıqlanǵan jaǵdaylar boyınsha bajıxana uyımları tárepinen sorastırıw háreketleri alıp barılmaqta.

ÓzA