Ózbekstan Respublikası mámleketlik ǵárezsizliginiń 34 jıllıǵı bayramı aldınan Nókis qalasınıń shetki aymaqlarınıń biri Qarataw mákan puqaralar jıyınında haqıyqıy insanıy mehir hám ǵamqorlıq ruwxı tiykarı bolǵan ilaj ótkerilip, “Insan qádiri” principi tiykarında xalıqtıń salamatlıǵın saqlaw maqsetinde keń kólemli medicinalıq tekseriw shólkemlestirildi.

Júrek-qan tamır, semizlik, qantlı diabet, ókpe jolları kesellikleri sıyaqlı kóp ushırasatuǵın keselliklerdi erte anıqlaw, al hayal-qızlar arasında qantlı diabet hám kókirek bezi raginiń aldın alıwǵa qaratılǵan bul akciyada puqaralardıń júzlerinde minnetdarshılıq, kewillerinde úmit sezimi payda boldı.
Xalıq rentgen, UTT, laboratoriyalıq tekseriwler, EKGden ótkerildi. Sonday-aq, kardiolog, psixiatr, travmatolog, xirurg, nevropatolog, gematolog, otolaringolog sıyaqlı túrli baǵdardaǵı shıpakerler kóshpeli qabıllaw ótkerdi.
– Biz shetki aymaqta jasaymız, shıpakerlerge barıw qıyın boladı. Búgin bolsa sonsha qánige úyimizge kelip, tekseriw ótkerdi. Bul biz ushın úlken qolaylıq,-deydi máhálle turǵını M.Dilimbetova.
– Kóbinese kesellikler kesh anıqlanadı. Bunday tekseriwler bolsa, erte diagnoz qoyıw hám emlew imkaniyatın beredi,-deydi ilajda qatnasqan shıpaker V.Upatullaeva.
Eń quwanıshlısı, tekseriwler nátiyjesinde anıqlanǵan kesellikler boyınsha nawqaslarǵa zárúr biypul dári-dármaqlar tapsırıldı.
“Qarataw” xalqı bul baslamanı insan qádiri hám salamat turmısqa qaray áhmiyetli qádem sıpatında qabıl etti.

Qaraqalpaqstan xabar agentligi.