Ózbekstan hám Qırǵızstannıń birgelikte shólkemlestirgen “Salamat” sanatoriy-emlew kompleksiniń jańa imaratınıń qurılısına tırnaq tası qoyıldı, dep xabar beredi “Dunyo” MA.

«Ilajǵa Qırǵızstan Prezidentiniń Osh wálayatındaǵı wákillikli wákili Elchibek Jantaev, Qarasuw rayonınıń basshıları hám Tashkent qalasındaǵı “Akfa Medlayn” kóp tarmaqlı klinikasınıń xızmetkerleri hám basqalar qatnastı.
Ózbekstan hám Qırǵızstan birgelikte jumıs alıp baratuǵın bul medicina mákemesi bes qabattan ibarat bolıp, onda zamanagóy medicinalıq úskeneler menen támiyinlengen xirurgiyalıq ámeliyatlar blogı, reabilitaciya xanaları, konferenciya zalı hám ilimiy oray jaylasadı. Jańa medicina orayı bir waqıttıń ózinde 70 nawqastı qabıllaw imkaniyatına iye boladı. Oray tolıq iske qosılǵannan soń 100 jańa jumıs ornı jaratıladı.
Joybardıń ulıwma bahası bolsa 3,5 million AQSh dollarına teń. Qurılıs jumısları 2026-jıldıń avgust ayında juwmaqlanadı.
Ilajda shıǵıp sóylegenler sońǵı jıllarda Ózbekstan hám Qırǵızstan basshılarınıń is-háreketleri nátiyjesinde eki mámleket arasında doslıq qatnasıqlar barlıq tarawlarda, sonıń ishinde, medicina tarawında da jedel rawajlanıp atırǵanın atap ótti», delinedi xabarda.

Qaraqalpaqstan xabar agentligi