Ózbekstan Respublikası Ishki isler ministrligi delegaciyası Sankt-Peterburg qalasında bolıp ótken ǴMDAǵa aǵza mámleketler Ishki isler ministrleri keńesiniń gezektegi májilisinde qatnastı.

Keńes májilisinde Ózbekstan, Armeniya, Belarus, Qazaqstan, Qırǵızstan, Tájikstan respublikaları jáne Túrkmenstan hám Rossiya Federaciyası ishki isler ministrlikleri delegaciyaları, sonday-aq, ǴMDAǵa aǵza mámleketler aymaǵında shólkemlesken jınayatshılıq hám basqa da qáwipli jınayatlarǵa qarsı gúresiwdi muwapıqlastırıw byurosınıń direktorı, ǴMDAǵa aǵza mámleketlerdiń terrorizmge qarsı gúresiw orayınıń basshısı hám ǴMDA atqarıw komitetiniń juwapkerleri qatnastı.
Ilajda ǴMDAǵa aǵza mámleketler ishki isler ministrlikleriniń birge islesiwiniń tiykarǵı máseleleri hám jınayatshılıqqa qarsı gúresiw tarawındaǵı mámleketleraralıq baǵdarlamalardıń orınlanıwı dodalandı.
ǴMDAǵa aǵza mámleketler ishki isler ministrlikleri arasında ekspert-kriminalistika jumısı tarawında birge islesiw nátiyjeliligin arttırıw, Málimleme-kommunikaciya texnologiyaları tarawında júz beriletuǵın jınayatlarǵa qarsı gúresiwde málimleme almasıwın rawajlandırıw, ǴMDAǵa aǵza mámleketlerdiń jol háreketi qáwipsizligi tarawında joqarı bilimlendiriw hám qosımsha bilimlendiriw baǵdarlamaları boyınsha kadrlar tayarlaw tarawın rawajlandırıw hám nızamsız migraciyaǵa qarsı gúresiwde óz-ara birge islesiwdiń áhmiyetli máseleleri boyınsha sóylesiwler ótkerildi.
Delegaciyalardıń basshıları tárepinen keńes sheńberinde qabıl etilgen qararlarǵa hám keńeske basshılıq etiwshi tárepinen májilis protokolına qol qoyıldı.
Ilaj sheńberinde Ózbekstan Respublikası Ishki isler ministriniń Rossiya Federaciyası hám Belarus ishki isler ministrleri menen eki tárepleme ushırasıwları shólkemlestirildi.
Tárepler huqıqtı qorǵaw tarawındaǵı óz-ara birge islesiwdi bunnan bılay da bekkemlew máseleleri, sonıń ishinde, transmilliy shólkemlesken jınayatshılıq, terrorizm, náshebentlik zatlardıń nızamsız sawdası hám málimleme texnologiyaları tarawındaǵı jınayatlarǵa qarsı gúresiw máseleleri boyınsha pikir alıstı. Sonday-aq, usı tarawlarda kadrlar tayarlaw hám olardıń mamanlıǵın arttırıwda birge islesiw baylanısların jetilistiriw boyınsha perspektivalı rejelerdi dodaladı.
Ilajlar doslıq hám konstruktivlik ruwxta ótti. Tárepler keleshektegi baylanıslardı institucionallıq dárejede rawajlandırıwǵa, ámeliy nátiyjelerge baǵdarlanǵan birgeliktegi joybarlardı ámelge asırıwǵa kelisip aldı.

ÓzA