Elim degen, xalqım degen hár bir insan ushın bir ǵana súren bar. Olda bolsa «Watan ushın, millet ushın, xalıq ushın». Ózbekstan Respublikası ǵárezsizliginiń 34 jıllıǵı aldınan bolıp ótip atırǵan bayram ilajları usı súren astında alıp barılıp, onda qatnasqan hár bir jerlesimizdiń júzinde kúlki, usınday jánnetmákan jurtta jasap atırǵanlıǵı ushın shúkirshilik sezimlerin ańǵarasań.

Usınday bayram ilajlarınıń biri Qońırat rayonındaǵı “Rawshan” APJ aymaǵında jaylasqan 5-sanlı ulıwma bilim beriw mektebinde bolıp ótti.
Ushırasıw sheńberinde bolıp ótken mánawiyat festivalında ilim, ádebiyat hám kórkem óner wákilleri, zıyalılar qatnasıp, Ǵárezsizligimizdiń 34 jıllıǵınıń keń túrde belgileniwi, mámleketimizde ámelge asırılıp atırǵan keń kólemli reformalar haqqında sóz etti.
Kún tártibindegi másele boyınsha ushırasıwda Qaraqalpaqstan Respublikası Ruwxıylıq hám aǵartıwshılıq orayı, “Márifat” úgit-násiyatshılar jámiyetiniń aǵzası, QMU docenti, yuridika ilimleriniń kandidatı X.Kabulov, Berdaq atındaǵı QMU jurnalistika kafedrası professorı, filologiya ilimleriniń doktorı T.Masharipova, “Vesti Qaraqalpaqstana» gazetasınıń arnawlı xabarshısı X.Xalilaeva, “Nuraniy” qorı rayonlıq bóliminiń baslıǵı X.Qurbanbaev hám keń jámiyetshilik wákilleri menen oqıwshı jaslar qatnastı.
Ilajda shıǵıp sóylewshilerdiń atap ótkenindey elimizde alıp barılıp atırǵan sociallıq-ekonomikalıq reformalardıń negizgi baǵdarı insan faktorı ushın bolıp, jaslardıń bilim alıwı, ilim úyreniwi, kásip iyelewi ushın barlıq imkaniyatlar jaratılıp beriliwi menen birge hayal-qızlardıń huqıqların qorǵaw, olardıń bántligin támiyinlew ushın alıp barılıp atırǵan ilajlar haqqında sóz etti. Kewlinde Watanǵa sadıqlıq, milletke húrmet hám xalıqshıllıq sezimlerin bekkemlew boyınsha alıp barılıp atırǵan ilajlar haqqında aytıp ótti.
Bayram ilajı elimizde jasap atırǵan túrli millet wákilleriniń milliy qosıq hám ayaq-oyınlarınan dúzilgen koncert baǵdarlaması menen dawam etip, xalıqlar doslıǵı bayramına ulasıp ketti.

Qaraqalpaqstan xabar agentligi