Elimizde kekselerdi qádirlew, olardıń turmıslıq tájiriybesin jas áwladqa úlgi sıpatında jetkeriw, jámiyettegi belsendiligin arttırıw maqsetinde túrli ilajlar shólkemlestirilmekte. Bunday baslamalar arqalı olardı jámiyettiń rawajlanıwına óz úlesin qosıwǵa xoshametlew úlken áhmiyetke iye.

Beruniy rayonında “Nuraniy” qorı rayonlıq bóliminiń baslaması menen “Ǵayratlı kekseler” súreni astında sport jarısları ótkerildi. Ilajda máhállelerden belsendi kekse áwlad wákilleri qatnastı.
Jarıslarda shaxmat, shashka hám milliy gúres boyınsha bellesiwler shólkemlestirildi. Belsene qatnasqan nuranıylar arasında doslıq báseki ruwxında ótken jarıslar úlken qızıǵıwshılıq oyattı. Ilaj sońında “Nuraniy” qorı rayonlıq bóliminiń baslıǵı F.Annasafarov jeńimpaz hám belsene qatnasıwshılardı múnásip sıylıqladı, – dep maǵlıwmat beredi rayon hákimligi Málimleme xızmeti bólimi.
Bunday ilajlar kekse áwlad wákilleriniń turmısqa bolǵan qızıǵıwshılıǵın jáne de arttırıp, olardı jámiyette jáne de belsendi bolıwǵa shaqıradı. Sonıń menen birge, jaslar ushın da múnásip órnek bolıp xızmet etedi.

Qaraqalpaqstan xabar agentligi