Usı jılı ÓzLiDeP Siyasiy Keńesi Atqarıw Komitetiniń baslaması menen islep shıǵılǵan joybar “Isbilermen hayal” tańlawına 10 jıl toldı. Bul tańlaw mámleketimizde hayal-qızlar isbilermenligin rawajlandırıw, olardıń ekonomikalıq-sociallıq belsendiligin arttırıw, kishi biznes hám jeke isbilermenliktegi qatnası hám jámiyettegi ornın bekkemlew maqsetinde shólkemlestirilmekte.

Nókis qalalıq kásiplik kónlikpeler orayında usı tańlawdıń Respublika aymaqlıq basqıshı joqarı dárejede, bayram keypiyatında ótkerildi.
Ilajda deputatlar, ÓzLiDePtiń baslanǵısh partiya shólkemlerindegi belsendi hayal-qızları, partiyanıń juwapker xızmetkerleri, 50 den aslam isbilermen hám fermer hayal-qızlar, sonday-aq, birge islesiwshi shólkemler – Ózbekstan Sawda-sanaat palatasınıń Qaraqalpaqstan Respublikası basqarması, Qaraqalpaqstan Respublikası fermerler keńesi hám kásiplik awqamları birlespesi hám ǴXQ wákilleri qatnastı.
Onda ÓzLiDeP Siyasiy Keńesi Atqarıw komiteti baslıǵınıń orınbasarı A.Aslonov, Oliy Majlis Nızamshılıq palatasınıń deputatı R.Sabirov, Qaraqalpaqstan Respublikası Joqarǵı Keńesiniń komitet baslıǵı Sh.Otemisov hám ÓzLiDeP Qaraqalpaqstan Respublikası Keńesiniń baslıǵı S.Turmanovlar shıǵıp sóylep, mámleketimiz ǵárezsizliginiń 34 jıllıq bayramı múnásibeti menen bársheni qızǵın qutlıqlap, sońǵı jılları ámelge asırılıp atırǵan keń kólemli reformalar, ásirese, hayal-qızlar isbilermenligin qollap-quwatlaw tarawındaǵı áhmiyetli baslamalar hám ámeliy jumıslarǵa ayrıqsha itibar qarattı.
Tańlawda qalalıq hám rayonlıq basqıshlarda jeńimpaz dep tabılǵan 17 isbilermen hayal-qız óz jumısına baylanıslı videorolikler hám kórgizbeleri menen qatnastı. Olardıń arasında milliy kiyim brendlerin tigiw menen shuǵıllanıp atırǵan cex basshıları, 20 dan aslam túrdegi nan ónimlerin islep shıǵarıp atırǵan isbilermenler, fermer xojalıǵınıń iyeleri, xızmet kórsetiw hám óndiris tarawlarında jumıs alıp barıp atırǵan hám bir neshe hayal-qızlardı jumıs penen támiyinlep atırǵan aldınǵı qatardaǵı hayal-qızlar boldı.
– Sonday-aq, tańlaw sheńberinde shólkemlestirilgen ámeliy master-klasslar qatnasıwshılar ushın tek ǵana jańa bilim alıw emes, al olardı kúndelikli isbilermenlik ámeliyatına nátiyjeli engiziwde áhmiyetli qádem boldı,-deydi ÓzLiDeP Qaraqalpaqstan Respublikası Keńesiniń bólim baslıǵı A.Esemuratova. – Juwapkerler tárepinen ótkerilgen sabaqlarda gózzallıq salonın basqarıw sırları, mikro-zelen jetistiriw usılları haqqında anıq hám ámeliy usınıslar berildi. Qatnasıwshılar bul bilimler arqalı óz bizneslerin jańa basqıshqa alıp shıǵıw imkaniyatına iye bolıp, básekige shıdamlılıq hám dáramattı arttırıwda úlken imkaniyatlar ashıldı.
– Mikro-zelen haqqındaǵı ámeliy sabaq maǵan jańa baǵdar berdi. Bul arzan, biraq paydalı biznes eken. Endi óz jumısıma qosımsha túrde bul baǵdardı da baslawdı rejelestirip atırman. Tańlaw – men ushın tek ǵana tanısıw hám kórgizbe emes, al jańa ideyalar fabrikası boldı,-deydi Beruniy rayonında fermerlik jumısı menen shuǵıllanıp atırǵan Nargiza Qurbaniyazova.
Bunday bilimler hayal-qızlarǵa tek ǵana isenim emes, al dáramat dáregin diversifikaciyalaw, básekige shıdamlı ónim islep shıǵarıw hám bazarda óz ornın bekkemlew imkaniyatın beredi. Isbilermen hayal-qızlar master-klasslar olarǵa jańa ruwx, jańa ideya hám ámeliy bilim alıp kelgenin atap ótti.
Tańlaw nátiyjelerine muwapıq 1-orın iyesi Ámiwdárya rayonı Mańǵıt qalasınan nan hám nan ónimleri, sútti qayta islew kishi kárxanasınıń baslıǵı, “MF food” hám “AMUDARYO Milky Food” brendiniń tiykarın salıwshısı Dildora Hayitbaeva dep tabıldı. Sonday-aq, Xojeli rayonı “Xatcha mama” fermer xojalıǵınıń baslıǵı Tájibiyke Matkarimova 2-orındı, Kegeyli rayonınan milliy kiyimler tigiw cexınıń baslıǵı Gúlnur Perdebaeva 3-orındı iyeledi.
Tańlaw jeńimpazları ÓzLiDeP Siyasiy Keńesi Atqarıw komiteti tárepinen ajıratılǵan aqshalay sıylıqlar, diplom hám estelik sawǵaları menen sıylıqlandı.
Sonday-aq, “Zamanagóy intaker hayal,” “Jıldıń keńpeyil isbilermen hayalı,” “Awıldı sociallıq rawajlandırıwda belsendilik kórsetken fermer hayal,” “Investiciyalardı tartıwda baslama kórsetken isbilermen hayal” hám “Eń jas, belsendi hayal isbilermen” sıyaqlı nominaciyalar boyınsha da jeńimpazlar anıqlanıp, ayrıqsha xoshametlendi.
Ilaj Ózbekstan mámleketlik kórkem óner hám mádeniyat institutınıń Nókis filialı tárepinen shólkemlestirilgen koncert baǵdarlaması menen dawam etti.

Qaraqalpaqstan xabar agentligi