Nókis qalasında “Shańaraqlıq (turmıslıq) zorlıq hám jınısıy zorlıq etiwge baylanıslı jınayatlar hám hákimshilik huqıqbuzarlıqlardıń aldın alıw boyınsha ámelge asırılǵan jumıslar, bar mashqalalar hám olardıń sheshimleri jáne keleshektegi wazıypalar” atamasında seminar bolıp ótti.

Ilajdı Joqarǵı sud baslıǵınıń birinshi orınbasarı I.Muslimov alıp barıp, usı kategoriyadaǵı jınayat isleri boyınsha sorastırıw, tergew uyımları hám sudyalar tárepinen qarar qabıl etiwde jol qoyılıp atırǵan qáte-kemshilikler, olardıń aldın alıw ilajları hám sud ámeliyatın birdey etiw máselelerine ayrıqsha toqtap ótti.
Bul seminar 2023-jıl 11-aprelde qabıl etilgen “Hayal-qızlar hám balalardıń huqıqları, erkinlikleri jáne nızamlı máplerin isenimli qorǵaw sistemasınıń bunnan bılay da jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı Nızamına tiykarlanıp payda bolǵan huqıqıy ózgerisler ámeliyatta qalay engizilip atırǵanın tallawǵa baǵıshlandı.
Usı Nızam menen Jınayat kodeksine 126-1-statya (shańaraqlıq (turmıslıq) zorlıq) hám 141-3-statya (abırayın hám qádir-qımbatın kemsitiwshi maǵlıwmatlardı tarqatıw), al, Hákimshilik juwapkershilik haqqındaǵı kodeksine bolsa 59-2-statya (shańaraqlıq (turmıslıq) zorlıq) hám 41-1-statya (jınısıy zorlıq etiw) kirgizilgen.
– Sonday-aq, Nızamnıń orınlanıwın támiyinlew hám huqıqtıń birdey qollanılıwın támiyinlew maqsetinde Joqarǵı sud Plenumı tárepinen 2023-jıl 20-aprel kúni qarar qabıl etilgen bolıp, ol sudlar ushın ámeliy qollanba wazıypasın atqaradı. Bul qarar sud ámeliyatında jańa huqıqıy normalardıń anıq hám ádil qollanılıwın támiyinlewge xızmet etiwge qaratılǵan,-deydi Qaraqalpaqstan Respublikası sudınıń bas konsultantı G.Ganieva.
Biraq, nızam qabıl etilgenine 2 jıldan aslam waqıt ótken bolsa da, elege shekem sorastırıw, tergew uyımları hám sudlar tárepinen bir qatar úlken qáte-kemshiliklerge jol qoyılıp, bul seminarda usı kemshiliklerdi saplastırıw boyınsha zárúr ilajlar belgilendi.
Ilajda sudyalar, prokuratura hám ishki isler uyımlarınıń xızmetkerleri, Sociallıq qorǵaw agentligi hám balalardıń huqıqları boyınsha wákillerdiń regionallıq wákilleri qatnasıp, nızamdı orınlaw, profilaktikalıq jumıslar, jábirlengenlerge járdem kórsetiw, jınayat islerin nátiyjeli tergew hám sud ámeliyatında birdey qatnaslardı támiyinlewge qaratılǵan usınıslar bildirildi.

Qaraqalpaqstan xabar agentligi