Kúni keshe mámleketimiz basshısınıń basshılıǵında toqımashılıq tarawında eksport imkaniyatları hám rezervlerdi iske qosıw máseleleri boyınsha bolıp ótken videoselektor májilisinde dúnyada jasalma talshıq hám aralas gezlemege talap jıldan-jılǵa artıp baratırǵanına itibar qaratılıp, 2028-jıl 1-yanvarǵa shekem aralas gezleme bajıxana bajısınan azat etiletuǵını atap ótildi.

Sonday-aq, májiliste Evropa hám AQSh bazarına tayar kiyim-kenshek eksportın keńeytiw máselelerine de ayrıqsha toqtap ótildi.
Toqımashılıq kárxanalarına jeńillikler hám imkaniyatlar, xoshametler beriliwi nátiyjesinde alıs rayonlarda da kárxana filialları ashılıp, xalıqtıń jumıs penen támiyinleniwi boyınsha alǵa qoyılǵan baslamalar Qaraqalpaqstan Respublikasınan baslanatuǵını belgilendi.
Májiliste berilgen tapsırmalardan kelip shıǵıp, Qaraqalpaqstan Respublikası Bajıxana basqarması baslıǵınıń birinshi orınbasarı M.Urazaliev Beruniy rayonında trikotaj gezleme hám tayar kiyim-kenshek islep shıǵarıw menen shuǵıllanıwshı kárxanada boldı.
Jılına 6 million dana tayar ónim islep shıǵarıw quwatlılıǵına iye bul kárxanada búgingi kúnde 350 jergilikli xalıq turaqlı jumıs orınları menen támiyinlengen.
Kárxana 2024-jıl dawamında 2,9 million AQSh dolları bahasındaǵı 641 tonna kiyim-kenshek hám iyirilgen jip ónimlerin Qıtay, Pakistan, Rossiya, Túrkiya hám Ukraina mámleketlerine eksport etken bolsa, usı jıldıń basınan 272 mıń AQSh dolları bahasındaǵı tovarlar eksportı ámelge asırılǵan.
Ushırasıw dawamında bajıxana juwapkerleri tárepinen kárxana basshısına “bajıxana aymaǵında qayta islew” rejiminiń abzallıqları túsindirilip, rejimnen paydalanǵan halda keleshekte kárxananıń eksportlıq potencialın jáne de arttırıw imkaniyatları ámeliy mısallarda kórip shıǵıldı. Toqımashılıq tarawı ushın nızamshılıqta jaratılǵan imkaniyatlar hám jeńillikler boyınsha maǵlıwmat berildi.

Qaraqalpaqstan xabar agentligi