Jumıssızlıqtan qutılıw, qosımsha dáramat tawıp, shańaraǵına payda keltiriw arqalı mashqalalarǵa sheshim tabıw ushın mámleketimizde keń imkaniyatlar jaratılǵan. Onnan orınlı paydalanıp, istiń kózin bilgen adamlar ǵana qıyınshılıqlardan shıǵıspaqta. Elimizde alıp barılıp atırǵan «Kámbaǵallıqtan-abadanlıqqa qaray» baǵdarlaması tiykarında alıp barılıp atırǵan keń kólemli jumıslar da orınlarda bolıp atırǵan jaqsı ózgerisler menen óz nátiyjesin bermekte.

Ámiwdárya rayonı Shaykól awılında jasawshı belsendi hám intaker hayallardan biri – Dilnaza Aytımbetova «Hayal-qızlar dápteri» arqalı turmısında ushırasıp atırǵan qıyınshılıqlardan shıǵısıp atır. Máhálle juwapkerleriniń járdeminde ol qusshılıq jumısın jolǵa qoyıw ushın jeńilletilgen kreditke iye boldı.
Miynet súygishlik hám tırısqaqlıq penen jumıs baslaǵan Dilnaza bıyılǵı máwsimde tórt márte shójeler jetistirip, olardı máhálle turǵınlarına sattı hám shańaraǵına qosımsha dáramat tabıwǵa eristi. Onıń bul háreketleri tek ǵana shańaraǵına qosımsha dáramat keltirip qoymastan, al máhállede salamat báseki hám isbilermenlik ortalıǵın da bekkemlewge tiykar jarattı.
-Aldaǵı waqıtta qusshılıqtı jáne de keńeytip, onı tolıq túrdegi bizneske aylandırıw rejeleri ústinde jumıs alıp barmaqtaman. «Tawıq jeti ǵáziyneniń biri», degenindey, bul jániwarlarǵa mehir berip baǵıp, shańaraǵımız benen góshin, máyegin jep, sonday-aq, máhálleleslerime de satıp, qosımsha dáramat tabıwǵa erisip atırmız. Jumıssızlıqtan qıynalıp ne islerin bilmey otırǵan hayal-qızlarǵa másláhátim, hesh qashan ekilenbesten elimizde jaratılıp atırǵan imkaniyatlardan orınlı paydalanıwın usınıs etken bolar edim,-deydi Dilnaza.
D. Aytımbetova ózine degen isenimliligi hám miynet súygishligi menen basqa hayal-qızlar ushın turmıslıq úlgi bolıp xızmet etpekte.

G.Turdıshova, Qaraqalpaqstan xabar agentligi