Házirgi waqıtta Ájiniyaz atındaǵı Nókis mámleketlik pedagogikalıq institutında studentlerge qosımsha qolaylıqlar jaratıw baǵdarında nátiyjeli jumıslar alıp barılmaqta.

Atap aytqanda, studentlerdi turaq jay menen támiyinlewde gezekte turıwdıń aldın alıw, oqıw jılı baslanıwı qarsańında studentlerdiń turaq jaysız qalıwı jaǵdayların boldırmaw maqsetinde maǵlıwmatlar orayınıń jumısları jolǵa qoyıldı,-dep xabar bermekte,-NMPI baspasóz xızmeti.

Bul orayda instituttıń studentlerdi turaq jay menen támiyinlew jumısların muwapıqlastırıw bóliminiń qánigeleri, tyutorlar hám volontyorlar tárepinen turaq jayǵa mútáj bolǵan studentlerdi jataqxana hám ijara úyleri menen támiyinlew boyınsha ámeliy járdem berilmekte.
Institutta jańa oqıw jılı aldınan Nókis qalasında student-qızlar ushın 1076 orınlıq, er studentler ushın 93 orınlıq, Ellikqala rayonında 225 orınlıq studentler turaq jayları tayar halǵa keltirildi.
Sonday-aq, mámleketlik-jeke menshik sheriklik tiykarında úsh jerde – 100, 400 hám 362 orınlıq studentler turaq jayları jańa oqıw jılına studentlerdi qabıllamaqta.
Sonıń menen birge, institut átirapındaǵı máhállelerden 600 ge shamalas ijara úyleriniń sharayatları úyrenilip, jańa oqıw jılına tayarlap qoyıldı.
Maǵlıwmat ushın, Ministrler Kabinetiniń 2023-jıl 14-avgusttaǵı 376-sanlı qararı tiykarında tastıyıqlanǵan reglamentke muwapıq, studentlerdiń jataqxanalarǵa ornalasıw boyınsha arzaları usı jıldıń 1-avgust kúninen baslap Birden-bir interaktiv mámleketlik xızmetler portalı – my.gov.uz arqalı qabıl etilmekte.
Reglament tiykarında dáslep jeńillik hám ústinlikke iye talabanlar studentler turaq jaylarına qabıllanadı.

Qaraqalpaqstan xabar agentligi