Házirgi waqıtta orınlarda medicina tarawı qánigeleri tárepinen Prezidentimizdiń “Respublikada densawlıqtı saqlaw sistemasın hám xalıqqa medicinalıq xızmet kórsetiw principlerin jetilistiriw arqalı tarawdı reformalawdı basqıshpa-basqısh dawam ettiriw ilajları haqqında”ǵı PP-88-sanlı pármanı, “Densawlıqtı saqlaw sistemasında reformalardı ámelge asırıwdıń qosımsha ilajları haqqında”ǵı PQ-185-sanlı qararı talaplarınıń orınlanıwın támiyinlew maqsetinde “Salamat turmıs tárizin qáliplestiriw” atamasında oqıw-seminarları ótkerilmekte.

Salamatlıq hám strategiyalıq rawajlanıw institutı Qaraqalpaqstan Respublikası aymaqlıq bólimi tárepinen “Medicinada áhmiyetli 90 kún” baǵdarlaması sheńberinde “Salamat turmıs tárizin qáliplestiriw” atamasındaǵı gezektegi seminar Kegeyli rayonlıq medicina birlespesiniń juwapker medicina xızmetkerleri ushın shólkemlestirildi.
Seminarda I hám II qáwip toparına kirgizilgen puqaralar arasında salamat turmıs tárizi hám kesellikler profilaktikası boyınsha túsindiriw jumısları alıp barıldı.
Sonday-aq, seminarda dene salmaǵı indeksin esaplaw, qantlı diabettiń 2 túri hám júrek-qan tamır kesellikleri qáwipin anıqlaw boyınsha telegram-botlar hám mobil qosımshalar, sonday-aq, “Salamat bolayıq” platforması, jasalma intellekt járdemshisi menen qalay islesiw kerekligi úyretildi.
Qatnasıwshılar qánigelerden ózlerin qızıqtırǵan sorawlarǵa juwap alıp, pikir alıstı.

Qaraqalpaqstan xabar agentligi