«Jańa Ózbekstan Olimpiada shoqqıları» sport jarıslarınıń 2-basqıshınıń ashılıw saltanatı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı A.Orınbaev shıǵıp sóylep, jarıstıń ashılıwı múnásibeti menen jıynalǵanlardı qızǵın qutlıqladı hám sportshılarǵa áwmet tiledi.
Usı jıl 5-28-avgust kúnleri aralıǵında «Jańa Ózbekstan Olimpiada shoqqıları» sport jarıslarınıń 2-basqıshı sheńberinde jámi 10 sport túri boyınsha jarıs ótkerilip, jeńimpazlardıń anıqlanıwı belgilengenligin atap ótiw orınlı.
Bul basqıshta tabıslı qatnasıp, juwmaǵında óz salmaq kategoriyalarında jeńimpaz bolǵan qatnasıwshılar úshinshi basqısh – Prezident olimpiadasında qatnasıw imkaniyatın qolǵa kirgizedi.
Bunnan soń kún dawamında ótkeriliwi belgilengen bellesiwler baslap jiberildi. Onda Respublikamızdıń barlıq qala hám rayonlarınan kelgen jas sportshılar qatnastı.
Qızǵın qarama-qarsılıqlarǵa bay túrde bolıp ótetuǵın jarıs juwmaǵında jeńimpazlar diplom, medallar hám bahalı sawǵalar menen sıylıqlanadı.

Qaraqalpaqstan xabar agentligi.