Búgingi kúnde jaslardıń bántligin támiyinlew máselesine úlken itibar qaratılmaqta. Bul baǵdarda hár qıylı ilajlar, joybarlar hám baslamalar turmısqa engizilmekte. Usı maqsette Tórtkúl rayonında da áhmiyetli baslama ámelge asırıldı.

Rayon prokuraturasınıń baslaması menen ótkerilgen miynet yarmarkasında 100 ge shamalas jaslar qatnastı. Bul ilaj arqalı olardıń keleshegine áhmiyetli tırnaq qoyıldı. Jigit-qızlar ushın jumıs orınları usınıs etildi, óz-ara sóylesiw hám másláhátlesiwler shólkemlestirildi.
Yarmarka juwmaǵında 10 nan aslam jaslar turaqlı jumıs penen támiyinlendi. Sonıń menen birge, 5 jasqa isbilermenlik jumısın baslawda járdemlesiw belgilendi. Bunnan tısqarı, 4 jas ózin-ózi bánt etiw baǵdarında kerekli miynet quralları menen támiyinleniwi rejelestirildi, – dep maǵlıwmat beredi rayon hákimligi Málimleme xızmeti bólimi.
Bunday ámeliy jumıslar arqalı jaslar tek ǵana dáramat dáregine iye bolıp qalmastan, al jámiyette óz ornında tappaqta. Bántlik máselesindegi hár bir háreket – olardıń keleshekte erkin turmıs keshiriwi, materiallıq turaqlılıǵı hám belsendi puqara sıpatında qáliplesiwinde ayrıqsha áhmiyetke iye.

Qaraqalpaqstan xabar agentligi